Loneitute nawrh huaihawt vangin Delhi ramri khar chhunzawm a la ni

Delhi Traffic Police-te chuan nimin khan Delhi ramria hmun hrang hrang khar chhunzawm a la ni tih sawiin Ghazipur, Singhu, Auchandi leh hmundang eng emaw zatah chuan loneitute'n nawrh an la huaihawt chhunzawm zel avangin lirthei kal an la khap tih an sawi.

Farm law thar duh loa nawrh huaihawt mek loneitute hi nimin thleng khan ni 19 chhung an nuar tawh a, nimin khan chaw ngheia nawrh huaihawtin tlai dar 5 thleng thil an ei lo a, ramchhung hmun hrang hrangah sit-in protest an nei bawk. 

Delhi Traffic Police-te tarlan dan chuan Ghaziabad aṭanga Delhi panna kawng ber chu khar a ni a, Delhi pan tumte chu kawng dang zawh turin an ti a ni. Loneitute hian Pathianni khan Jaipur-Delhi highway chu Rewari-ah an lo dang tawh bawk a, mahse chawhnu lam dar 2 khan helai kawng hi chu an hawng leh hman thung.

Farm bill pathum- Farmers (Empowerment and Protection) Agreement of Price Assurance and Farm Services Act, 2020,  Farmers Produce Trade and Commerce (Promotion and Facilitation) Act, 2020 leh Essential Commodities (Amendment) Act 2020 duh loin loneitu pawl hrang hrangte chu November 26 aṭang khan nuar tawhin Delhi an pan khawm a, heng loneitu tam ber hi Punjab leh Haryana mi an ni.

Loneitu pawl hotu leh sorkar laipui aiawhte chu ṭum nga lai an inbe tawh a, heti chung hian inremna an la siam hleithei lo.

Delhi chief minister Arvind Kejriwal chuan nimin khan loneitu nuarte a thlawpna lantirin chaw a nghei a, Aam Aadmi Party (AAP) member-te leh thlawptute chu amah zawm turin a sawm bawk.

Arvind Kejriwal hian chaw ngheia nawrh huaihawt a tum chungchang hi Pathianni khan sawiin AAP thlawptute chu chaw nghei ve turin a sawm zui a, hei hi loneitute hrehawmna tawrhpuina tura tih a nih thu a sawi.

Bihar BJP chuan Pathianni khan sorkar laipuiin dan a siam thar Farm law thlawpna ni 13 awh tur campaign an hawng.

Union minister for law Ravi Shankar Prasad leh state president Sanjay Jaiswal-te chuan hemi chungchangah hian Patna-ah inbiakna neiin dan siam thar pathumte chu loneitute tana ṭha tur a nih thu leh, thlai thar zawrh chhuah chungchanga middlemen system tihbona tur a nih thu an sawi.

Ravi Shankar Prasad chuan PM Modi-a'n loneitute chu hlawk se a duh thu sawiin, loneitute chuan an ram an zawrh emaw an tihral emaw a ngai dawn lo tih a sawi. "He dan thar hnuaiah hian company-in loneitute thlai thar chhuah lei tura inremna a siampui chuan, company chuan loneitute chu thlai chin dan ṭha zawk leh thlai chi ṭha zawk an pe dawn. Chu chu eng nge a dik lohna awm?," tiin zawhna a zawt.

BJP campaign hi district 38-a Assembly constitueny 243-ah neih a ni dawn a, party hruaitute leh worker-te chuan loneitute inbiakna an neihpui dawn a, union minister-te pawhin he hun hi an telpui ṭhin dawn a ni.