December 2-ah all party meeting nei dawn

Parliament winter session chu December 4-ah ṭan a ni dawn a, sorkar laipui chuan session ṭan hma, December 2-ah all party meeting a ko.

All party meeting hi session ṭan hma ni khatah neih ṭhin a ni a, tun ṭumah erawh chuan December 3 hi state pangaa assembly inthlan vote chhiar tur avangin ni khata sawn hmain, December 2-ah all party meeting hi neih a ni ang.

Parliament session neih tur hi kum 2024 Lok Sabha inthlan neih hmaa session hnuhnung ber tura ngaih a ni a, Ethics committee-in Trinamool Congress MP, Mahua Moitra puhna an zir chianna leh bang tura an rawtna chu session ṭan ni hian ngaihtuah a ni ang. Mahua Moitra hi amah hmu turte hnen aṭanga pawisa la hmasa ṭhina puh a ni.

Criminal law bill pathum. IPC. CrPC leh Evidence Act te thlakna tura rawtna chu parliamentary committee on home affairs-in a pawm tawh angin sawiho tura ngaih a ni. Heng bill thlakna tura rawtna duh lohna hi member 10 chuan ziakin sorkar laipui hnenah hian an thlen tawh a ni. Hei bakah hian Chief Election Commissioner leh Election Commissioner te ruatna tur bill chu sawiho tura awm mek a ni bawk. He bill hmang hian CEC leh EC te chu Supreme Court judge level aṭangin cabinet secretary level-ah pawh hniam an ni dawn a ni tiin, eptu party leh chief election commissioner hluite chuan an duh loh thu an sawi thung.