NMC-in biology la lo tan NEET-UG 2024 exam phalsak

National Medical Commission (NMC) chuan medical course hrang hrang, MBBS leh BDS zir duh tana exam ngai, NEET-UG exam turin biology zirlai lo pawh an exam phalsak a nih thu an puang.

NMC-in thuchhuah an siamah chuan zirlai, pawl 12 leh a tlukpui chin zir zo a, Physics, Chemistry, Biology/Biotechnology, leh English late tan NEET-UG chu exam theih a nih thu leh physics, chemistry, mathematics emaw computer science late tan pawh biology emaw biotechnology tel lo pawhin exam theih a ni tiin a tarlang.

NMC hian June 6, 2023-a meeting-ah New Education Policy (NEP) ngaihtuah chunga an sawiho hunah 'Graduate Medical education Regulations 2023' a duang a, Medical Council of India (MCI)-in a siam, kalphunga an lo hman reng tawh chu siam ṭhat ngaia hriain tuna thutlukna hi an siam ta a ni. MCI-in Greater Medical Education, 1997 inkaihhruaina a siamah chuan MBBS zir tura exam tur hian Biology emaw Biotechnology chu subject lak tel ngei ngei ngai leh, pawl 12 an zawh hnu pawha additional subject anga lak chhunzawm a ngai a ni. NMC chuan tuna exam thei tur chin dan siam ṭhat a nih hmaa subject lak ngai tarlan, an lak loh avanga an dilna hnawlsakte pawh pawm leh vek tur a ni tih sawi nghal bawkin, NEET-UG exam thei tur hian tuna thuchhuah an siam hnua mite pawh exam phalsak an ni dawn a ni.