RTI Act-in CERT-IN huam dawn lo

Computer Emergency Response Team (CERT-In) chu Right to Information Act (RTI) danin a huam ve loh thu sorkar laipuiin a puang. Sorkar laipui hian CERT-In ang tho hian ram himna lam khawihtu ṭhenkhat; Intelligence Bureau (IB), Research and Analysis Wing (R&AW), Enforcement Directorate (ED) leh National Technical Research Organisation (NTRO) leh a dang eng emaw zat chu RTI hian a huam loh thu a sawi tawh a ni.

CERT-In hi India rama computer kaihhnawiha thil thleng, a pawi leh pawi loh dan a zira buaipui tura din a ni a, Ministry of Electronics and Information Technology hnuaia awm niin, mipui nawlpui hnena an himna tur lam kawhhmuh chu a thil tum a ni. Department of Personnel and Training (DoPT) thuchhuaha tarlan a nih danin,"RTI Act, 2005, section 24(2)-in thuneihna a pek angin sorkar laipui chuan second schedule-ah hian hetiang hian a tidanglam a ni," tiin, RTI Act, 2005-a second schedule serial 26 awm tawh dawtah chuan serial 27 belh a nih thu leh, chu serial chu Indian Computer Emergency Response Team tih a ni tiin an tarlang.

Kum 2005-a siam, RTI Act hian second schedule-a tarlan, intelligence leh security organisation-te a huam loh tur thu hi a tarlang a, mahse, eirukna leh mihring dikna chanvo rehbehna ang chi thilah erawh chuan RTI hmang hian zawhna zawh theih a ni thung a ni. Second schedule hnuaia RTI siam ṭhat a nih hnuhnun ber chu kum 2016 kha niin, heta dan siam ṭhatah hian Strategic Forces Command chu telh belh a ni tawh a, Ministry of Defence hnuaia Defence Research and Development Organisation leh Border Roads Development Board te pawh telh a lo ni tawh bawk. CERT-In hian tun hnaia cyber attack hrang hrang lo chhui tawhin, All India Institute of Medical Sciences-a 'Hospital Information Syatem (HIS) leh e-Hospital' beih a nih pawh khan chhui zui hna thawk hmasa bertu a ni.