Rajasthan assembly inthlanah vote 71.64% tla

Rajasthan state assembly chuan Inrinni khan inthlanna neiin, vote tla zawng zawng hi 71.65% a tling.

Vote thlak ni hian hmun ṭhenkhatah buaina tenau chhuak awm mah se, boruak muanawm tak hnuaiah mipuite'n vote thlak thei niin tarlan a ni a, state chhunga polling booth 51,000-ah vote thlak a ni.

Rajasthan assembly hi Congress leh BJP te inbeihna niin tam tak chuan an sawi, seat 200 awmin, seat 199 an inchuh a ni. Karanpur seat erawh chu Congress candidate thihna avangin inthlan hun sawn a ni thung. Polling booth-te chu zing dar 7 aṭanga tlai lam dar 6 thleng hawn a ni a, dar 6 hmaa polling booth thleng hmante chu rei tak thleng vote thlaktir an ni. Vote tlak ṭhatna ber hi Pokhran-a Jaisalmer-ah niin, vote tla hi 87.79% a ni a, Tijara-a, Alwar chuan dawt lehin, vote 85.15% a tling bawk.

Buaina tenau chhuak awm mah se inthlan a tibuai lo a, Sardarshahar polling booth-ah chuan municipal councillor aiawh pakhat chuan kutthlak a nih thu a sawi. Sanwler khua, Deeg district-ah chuan lunga invawmna thlengin hliam an awm a, hliam zingah hian police pawh an tel. Fatehpur-a Sikar polling booth-ah pawh party inelte chu intibuaiin, buaina chhuak avang hian police mi pakhatin hliam a tuar bawk a ni.