Nakkum March-ah CAA rules peih hman tum a ni : Ajay Mishra

Minister of state for home affairs, Ajay Kumar Mishra chuan Citizenship Amendment Act (CAA) rules-te chu hman theih tura nakkum March thlaa peih fel hman tum a ni, a ti.

Ajay Kumar Mishra hian West Bengal-a North 24 Parganas district-a Matua hnam inhmuh khawmnaah thu sawiin, hemi rual hian Matua hnamte chu hlauthawng lo tura chahin, an chanvo chu tumahin an chhuhsak dawn lo tih a sawi zui.

Union Minister hian CAA hnuaia dan hman turte siam nan Lok Sabha-a parliamentary committee on subordinate legislation chuan January 9, 2024 thleng hun an neih thu leh, Rajya Sabha committee chuan March 30, 2024 thleng hun an neih thu sawiin,"Khua leh tui nihna chanvo zawng zawng hi in nei vek ang. Fiahna tur document in neih ṭhat loh pawhin in lakah engmah tihtheih a awm lohna tur dan pawh kan siam tel dawn a ni," a ti.

"Nakkum March thlaah hi chuan dan hman tur hi peih hman kan beisei a, harsatna a awm erawh chuan hun kan mamawh belh maithei bawk. CAA hi ram pumah hman theih a ni tawh a, India sorkar hian khua leh tui nihna pek che u hi a tum a ni a, a tiam bawk che u a ni" tiin Mishra hian a tarlang bawk. CAA hnuaia dan hman turte zam tur hian kumin kum tir khan Home ministry chu a vawi sarihna atan hun pawhseisak tawh a ni.

Matua hi Hindu Namasudras an ni a, West Bengal-a cheng tam zawk hi Bangladesh aṭanga rawn pemte an ni. Kum 2019 Lok Sabha inthlanah khan Matua peng pakhat kal zela an hruaitu, Mr. Thakur chu Matua hnamte hnena India khua leh tui nihna pek tiam chungin Bongaon aṭanga thlan tlin a ni. CAA hnuaia dan hman turte peih a nih lawk loh avanga hlauthawng, Matua hnamte bawk hi nakkum Lok Sabha inthlan atan pawh Bengal chhim lama danglamna nasa siam theitu tura ngaih an ni.