UP-in halal chhinchhiahna chuang tihral hun tur bituk

Uttar Pradesh sorkar chuan an state chhunga nepnawi dawr, retailer leh department store- te tan hriattirna chhuahin an dawra halal pawmpuina chuang thil chi hrang hrangte tiral turin ni 15 chhung hun an pe tih an tarlang.

State sorkar hian UP chhunga thil siam chhuaktu, sorkar hriatpui ni lem lo pawlte hnen aṭanga halal pawmpuina lo dawng ṭhinte chu an thil siam thawn chhuah tawhte la kir leh vek emaw, pack ṭha leh vek turin a hriattir bawk.

Uttar Pradesh hian November 18 khan eitur siam chhuaha halal chhinchhiahna chuang reng rengte chu siam emaw, dah ṭhat emaw, zawrh chhuahna emaw khapna a lo siam tawh a, he khapna dan bawhzui hian state chhung district hrang hranga hmun 97 zeta thil siam chhuahna hmun 500 te chu dap nghalin, halal chhinchhiahna chuang ei tur, kg. 2,500 hu an man tawh bawk a ni. Sorkar hian halal pawmpuina siam dana thil dik lo awm chungchanga Hazratganj police station-a thubuai theh luh chu UP police, Special Task Force (STF) kutah a hlan tawh bawk a ni.

Thubuai theh luttu hi Bharatiya Janata Yuva Morcha (BJYM) office-bearer niin, firm ṭhenkhat chuan an thil siamte an hralh ṭhat theih nan halal pawmpuina an pek chhuah ve ringawt thu sawiin, hei hi sum hmuhna atana inbumna leh thil lem a nih thu an sawi. Heng firm-te lakah hian Indian Penal Code (IPC) section 120B (Inphiarrukna), 384 (tihluihnaa pawisa chhuhsak), 420 (inbumna), 467 (thil lem siam), 468 (mi bumna atana thil lem siam), 471 (thil lem siam a tak anga hman), 153A (hnam ṭhenkhat inkara inhuatna tuh) leh 298 (sakhaw rilru tihna tumna) hmangtea thubuai hi theh luh a ni.