Uttarakhand leiverha tangte lak chhuak hna thawk

Uttarakhand Char Dham project hnuaia leiverh chima tangte lak chhuah hna chu nimin khan thawh a ni a, nizan khan an lak chhuak kim theih beisei a ni.

November 12 khan km 4 leh a chanvea thui lei hnuai kawng verh lai mek, Silkyara tunnel chu metre 205 leh metre 260 inkarah chimin, metre 260 hnuai lama hnathawka awm, mi 41 te chu leiverhah hian an tang a ni. He leiverh hi Uttarakhand-a Hindu hmun pawimawh tak tak pali; Badrinath, Kedarnath, Gangotri leh Yamunotri te tana inkalpawhna tura siam niin, Uttarkashi district-a Dandalgaon leh Silyara inkara awm a ni.

Leiverhah hian hnathawk mi 41 te hi ni 17 zet an tang a, chhanchhuah hna thawh reng ni mah se an tanna lai hai tlang tura hmalaknaah rokhawlhna a awm ṭhin avangin lak chhuah an ni lawk thei lo a ni. Chhanchhuah hna hi National Disaster Response Force (NDRF), State Disaster Response Force (SDRF), police leh Thailand aṭangin mi thiam bikte'n an thawk a ni. Leiverha tangte hi biakpawh theih an ni a, ei tur leh in tur pek an ni a, mahse, an chhuahna tur kawng hi nimin khan laih tlang a ni chauh a ni. Khawl hmanga a chung tlak leh a phei zawnga laih tlang tum a nih hnuah 'rat-hole mining' thiam bik mi 24 te chuan hnathawktu tangte lak chhuahna tura ruahman, pipe phumna tur atan an awmna thleng an lai tlang thei ta a ni.

Lak chhuah hna thawh lai hian pawn lamah medical mi eng emaw zat inpeih renga an awm bakah, stretcher leh ambulance peih sa veka dah a ni bawk. Thuneitute chuan ambulance 41 buatsaih a nih thu leh, enkawlna an dawn vatna turin Chinyalisaur Community health centre chu buatsaih sa vek a nih tawh thu an sawi. Doctor-ten an endik hnuah enkawl chhunzawm an nihna tur hmuna phur turin helicopter buatsaih a ni bawk niin an sawi.