EC-in Telangana-a loneitute ṭanpuina scheme titawp

Election Commission (EC) chuan Telangana sorkarin an state-a loneitute ṭanpuina tura Rythu Bandhu scheme a kalpui mek chu model code of conduct a bawhchhia tiin scheme kalpui tura phalna a pek a titawp. EC chuan he scheme kalpuina atan bultumtu, state finance minister, T. Harish Rao hnena phalna pek pawh a tihtawpsak bawk.

EC hian November 25 khan Rythu Bandhu scheme hi khuahkhirhna eng emaw siama kalpui a lo remti tawh a; tlang hriat tura puanzar loh tur tih te, pawisa sem a nih hunah mipui pun khawmna tur siam loh tur tih te, politics-a hamṭhatna nei theite an tel tur a ni lo tih te a ni. Hemi thu-ah hian Congress chuan kar hmasa khan EC hnenah hian complaint theh lutin, Telangana-a rorel lai, Bharat Rashtra Samithi (BRS) chu inthlan campaign-na hmanrua atana Rythu Bandhu hmangah an puh.

Rythu Bandhu scheme hnuaiah hian loneitute zawng zawng bank account-ah thlai chin nana an mamawh leh thil dang leina atan a sum faia ṭanpuina pek ṭhin a ni. Rao hian November 28 khan Rythu Bandhu scheme hmanga pawisa sem a nih tur thu hi a lo sawi tawh a ni.