World cup final laia an au dan avangin Kashmir zirlai 7 man

Jammu & Kashmir police-te chuan Cricket world cup final khelh laiin Kashmir mi zirlai pasarihte chu Pakistan sawi vulna lam hawi zawnga au hla an chham avangin, Unlawful Activities Prevention Act (UAPA) hnuaia thubuai ziak lutin an man.

Zirlaite hi Ganderbal Shuhmana-a Sher-e-Kashmir University of Agricultural Sciences and Technology-Kashmir (SKUAST-K)-a zir vek an ni a, central Kashmir Ganderbal district police-te chuan an lakah hian UAPA hnuaia section 13-na (dan phal loh thiltih avanga tantir theih), bakah Indian Penal Code; section 505 ( hnam leh chi laka pawikhawih tumna) leh section 506 (thil sual tihtumna) hmangin thubuai an ziak lut a ni. Police-te'n thubuai an ziah luh hnu hian SKUAST-K-a zirlai tho, Punjab lam mi chuan complaint theh luh ve leh nghalin,"Match a zawh hnu khan Kashmir lam mi zirlaite hian min rawn tibuaiin, kan ram ka ṭan avanga min rawn khawih tumin min bitum a, ka ngawih loh chuan silaia kahah min vau a ni," tiin a tarlang. "Kashmir zirlaite kha Jeeve Jeeve Pakistan (Long live Pakistan) tiin an au a, kha khan Kashmir pawn lam aṭanga zirlaite min tihlau a ni," tiin a sawi bawk.

Hetih lai hian J&K students association chuan J&k Lt. Governor leh union home minister Amit Shah hnenah ngenna siamin, Kashmir zirlai mante laka UAPA thubuai chu hnukkir tura ngenin, an zirna hmakhua atan thil pawi thui tak a nih theih thu an sawi. Association national convener, Nasir Khuehami chuan,"Kashmir zirlaite chet dan leh khawsak chu kan dem a, chutih rual chuan he buaina hi police leh court hmaa chinfel tura kalpui aiin, mumal taka inremna nen sawi fel theih ni se kan duh. Hremna an pek tur hi a na mah mah a ni," a ti.