Vawiina assembly inthlan hmachhawn tur Telangana

Assembly seat 119 awmna, Telangana state assembly inthlan chu vawiinah neih a ni dawn.

Telangana-ah hian kum 2018 inthlanah khan Bharat Rashtra Samithi (BRS)-in seat 99 lain sorkarna an siam a ni. Kumin inthlanah hian candidate 2,290 awmin, candidate 355 hi national party aṭanga ding an ni a, state party aṭangin candidate 175 awm bawkin, independent-a ding 989 leh registered unrecognized party aṭangin candidate 771 an awm bawk niin Telangana Election Watch chuan an tarlang.

Party-te candidate neih dan dinhmun :

Bharat Rashtra Samithi (BRS):

Kum 2023 Telangana inthlan atan hian rorel lai, BRS chuan seat awm zawng zawng (119) an chuh dawn. An candidate 119 zinga 114 te hi crorepati niin, hei hi 96% zet an tling pha a, party zingah crorepati candidate ngah ber an ni. BRS candidate zawng zawngte hausakna lak rual hi Rs. vbc 25.62 a ni a, a hausa ber chu Bhongir constituency-a ding tur, Pailla Shekar Reddy niin, a hausakna belh khawm hi Rs. vbc 200 chuang a ni. Candidate thubuai nei 57 awmin, thubuai rip tak nei hi 34 an awm bawk a, 2018 inthlan (65) aiin kumina thubuai nei candidate an neih zat hi a tlem zawk a ni. BRS hian hmeichhe candidate 8 an nei bawk.

Indian National Congress (INC) :

Indian National Congress (INC) hian Telangana inthlan atan hian seat 118-ah an chuh dawn a, candidate-te hausakna lak rual hi Rs. vbc 38 niin an sang ber a, Chennur (SC) constituency-a ding tur, Congress candidate, Gaddam Vivekanand chu hausa berin, a hausakna hi Rs. vbc 600 chuang a ni a, Telangana inthlan chuh tur candidate zinga hausa ber a ni bawk. Congress hian crorepati candidate 111 an nei. Congress candidate 118 zinga 85 te hi thubuai nei lai niin, hei hi 72% a tling pha a, thubuai rip tak nei mek hi mi 60 awm bawkin, Congress hian thubuai nei lai candidate an ngah ber a ni. 2018 inthlan (69) nena khaikhinin Congress hian thubuai nei candidate hi kuminah hian an ngah zawk a ni. Congress aṭang hian hmeichhe candidate 12 an awm.

Bharatiya Janata Party (BJP) :

Kum 2018 inthlana seat pali laa pahnihna dinhmun hauhtu Bharatiya Janata Party (BJP) chuan kumin Telangana assembly inthlanah hian candidate 111 an nei dawn a, heng zinga mi 93 hi crorepati niin, candidate-te hausakna lak rual hi Rs. vbc 16.15 a ni. BJP candidate zinga hausa ber chu Serilingampally constituency-a ding tur, M. Ravi Kumar Yadav niin, a hausakna hi Rs. vbc 171 a tling. BJP hian candidate thubuai nei 79 neiin, thubuai rip nei candidate 54 an awm bawk a, kum 2018 inthlanah kha chuan BJP hian candidate thubuai nei 44 chauh an nei thung a ni. Hmeichhe candidate hi BJP hian 13 an nei dawn a, national party zingah hmeichhe candidate ngah ber an ni.

Party lian dang ṭhenkhat :

Telangana-a rorel lai, BRS bakah INC leh BJP tih lohah chuan kumin inthlanah hian BSP-in candidate ngah lehin, candidate 107 an nei dawn a, crorepati candidate 30 an nei tling a ni. BSP candidate zingah hian thubuai nei mi 40 an awm a, thubuai rip nei mi 28 an awm bawk. BSP candidate-te hausakna lak rual hi Rs, vbc 2.02 a ni bawk. BSP bakah hian Dharma Samaj Party chuan candidate 101 nei ve bawkin, party lian zinga chhiar tel theih an ni bawk. CPI(M) hian candidate 19 an nei dawn bawk a, crorepati candidate hi mi 7 an awm. CPI(M) candidate zinga 12 hi thubuai nei lai an ni. All India Forward Bloc chuan candidate 41 an nei bawk a, thubuai nei mi 10 awmin, crorepati candidate 18 an awm bawk.

Telangana assembly inthlanah hian hmeichhe candidate awm zawng zawng hi candidate 2,290 aṭangin 222 an ni a, independent candidate tam berin mi 87 an ni. Hmeichhia ni lo, mipa pawh ni lo candidate hi pakhat a awm bawk. Candidate upa ber hi independent candidate, Ravikota Madan Mohan a ni a, kum 84-na a hmang mek. Kum 25 tling chiah in-candidate hi mi 11 an awm bawk a ni. Kum 31-40 inkar tam berin, candidate 787 an awm thung.

An affidavit theh luh aṭanga a lan danin Telangana inthlan chuh tur zingah hian neih engmah nei lo mi 25 an awm a ni. Telangana-ah hian Hyderabad district chhungah constituency 15 awmin, candidate 312 zet an awm a, Rangareddy district chuan dawtin constituency 8-ah candidate 209 an awm. Red alert constituencies an tih, thubuai nei candidate pathum aia tam an dinna tur hi seat 96 zet awmin, Nalgonda district-a Munugoda constituency chu thubuai nei lai candidate 12 zetin an inchuh dawn a ni.