Uttarakhand leiverha tang lak chhuahte AIIMS-ah sawn

Uttarakhand-a Uttarkashi district-a leiverh hna thawk, November 12-a an leiverh chim avanga ni 17 zet tang mi 41 te chu Thawhlehni zan khan chhanchhuah kim an ni ta.

Leiverha tang mi 41-te hi an taksa dinhmun en dik a, enkawlna an dawn vat theih nana buatsaih, Chinyalisaur damdawi in buatsaiha dah an nih hnuah nimin khan helicopter-in Rishikesh-a All India Institute of Medical Sciences (AIIMS)-ah enkawlna ṭha zawk dawng tura sawn an ni.

Silkyara tunnel an tih, Char Dham project hnuaia leiverh hna thawh mek chim chhunga tang mi 41 te hi lak chhuah an nih hian hliam tuar an awm lo nia hriat a ni a, mahse, rei tak lei hnuaia an awm avangin lak chhuah an nih rual hian an taksa dinhmun hriat chian nan damdawi in buatsaih lailawkah dah nghal an ni. Hemi hnu hian Chinook helicopter-in Chinyalisaur aṭangin AIIMS, Rishikesh-ah phurh an ni a, hetah hian inenkawlna ṭha zawk pek an ni ang. Official-te chuan AIIMS-ah hian darkar 24 chhung endik an nih tur thu an sawi a, ni eng leh boruak ṭha dawng loa ni 17 zet an awm avanga fimkhur a ngaih thu leh test chi hrang hrang an neih tur thu an sawi.

Leiverh aṭanga lak chhuah an nih lai hian chhanchuah hna thawktute bakah an chhungte leh ṭhiante'n pawn lamah lo nghakin, Uttarakhand chief minister, Pushkar Singh Dhami pawh a hmunah hian a kal ve bawk. CM hian hnathawktu chhanchhuahte hi damdawi inah hian hmuin zángnadawmna Rs. nuai khat ṭheuh a pe bawk a ni.

Silyara tunnel chima tangte him taka lakchhuah an nih hnuah, nimin khan Congress party chuan Uttarakhand state-a project hrang hrangte chu chawlh tir rih a, leilung awmdante uluk taka enfiah leh phawt an phut. Congess general secretary Jairam Ramesh chuan hnathawktu chhanchhuah takte leh, chhanchhuah hna thawktu zawng zawngte an lawmpui leh zahna an hlan thu a sawi rualin, leiverh chim aṭang hian thil zir chhuah ngai a awm thu a sawi.