Union cabinet-in a thlawna buhfai sem chhunzawmna tur pawm

Prime minister Narendra Modi-a'n Chhattisgarh election rally-a a thlawna buhfai semna - Pradhan Mantri Garib Kalyan Anna Yojana (PMGKAY) kum nga chhung atana hman chhunzawm tum a nih thu a sawi hnuah, union cabinet chuan Nilaini khan PMGKAY chu January 1, 2024 aṭanga ṭanin, kum nga chhung kalpui chhunzawm turin an pawm. PMGKAY hnuaiah hian mi vbc 81.35 chuangin a thlawnin buhfai an dawng ṭhin a ni.

Cabinet meeting zawha chanchinthar lakhawmtute a kawmnaah, union information and broadcasting minister Anurag Thakur chuan he scheme atana sorkar sum sen tur chu kum nga chhung atan Rs. vbc nuai 11.80 a nih tur thu a sawi. "Sorkar hmalakna, PMGKAY hi khawvel huapa khawtlang leh mipuite ṭhatna atana ruahmanna lian ber a ni. Kum nga chhungin Rs. vbc nuai 11.80 sengin mipui vbc 81.5-in ei tur hrisel leh rintlak an neih theih phah dawn a ni," a ti. "Nunphung a tiawlsam ang a, One Nation One Ration Card hnuaiah fair price shop aṭangin buhfai a thlawnin an khai haw thei tawh a ni. Tun dinhmunah Antyodaya chhungkaw tan buhfai kg. 35 man hi Rs. 1,371 a ni a, chhangphut buh pawh kg. 35 chu Rs 946 man a ni. Heng zawng zawng hi PMGKAY hnuaiah hian sorkar laipuiin a tum vek a, ration card neite chuan buhfai mana an sum sen tur tam tak an hum theih phah a ni," tiin a sawi.

PMGKAY hi sorkar laipui hian Coivd-19 hri len lai, March 2020 aṭang khan a kalpui a, December 2022 khan tihtawp a ni. January 1, 2023 aṭang khan National Food Security Act hnuaia Antyodaya Anna Yojana (AAY) leh Priority Households (PHH) te chu PMGKAY hming hian kum khat chhung kalpui chhunzawm a ni leh a ni. He scheme hmang hian AAY ration card neite chuan chhungkaw pakhat zelah thla khat atan buhfai kg. 35 an dawng ṭhin a a, PHH scheme hmang hian chhungkuaa mi pakhat zelin thla khat atan buhfai kg. 5 an dawng ve thung a ni.