Telangana-ah assembly inthlan nei

Telangana assembly inthlan chu nimin khan neih a ni a, zing dar 7 aṭangin vote thlak ṭan a ni a, tlai dar 5 thleng vote thlakna hun hawn a ni. Telangana assembly-ah hian seat 119 awmin, candidate 2,290 an awm a, voter vbc 3.17 an awm bawk.

Telangana inthlanah hian Cyderabad commissionerate police chief chuan district palia constituency 13-ah venhimna hna an thawh thu sawiin, Telangana pumpuia polling station 35,655 awm zingah an venhimna chhungah hian polling station 3,202 a awm a ni. Cyderabad police chief, M Stephen Raveendra chuan inthlan felfai leh muanawm tak neih a nih theih nan theihtawp an chhuah thu a sawi a ni.

Vote thlak a nih mek lai hian Telangana-a rorel lai, BRS chuan Election Commission hnenah Telangana Pradesh Congress Committee laka complaint an theh lut. Congress chuan BRS president leh chief minister, K. Chandrasekhar Rao bakah an hruaitu hlun tak takte beih nan artificial intelligence leh deepfake technology an hman thu sawiin, heng hmanrua hmang hian audio leh video lem siama an theh darh thu an tarlang. BRS chuan EC chu Congress laka a rang lama action la tura an phut thu a tarlang bawk. Hetih lai hian BJP pawhin EC hnenah hian Telangana state police-te lakah complaint theh lut ve bawkin, police-te chu buaina chhuakte ngawi renga en liama puhin, state-a rorel lai, BRS chu an thawhpui niin an sawi bawk. Telangana inthlanah hian buaina tenau chhuak awm zeuh zeh mah se, tlai lam dar 3 thleng kha chuan buaina lian tham chhuak a awm hriat a ni lo.

Hriat theih chinah Medak district-ah vote tla ṭha berin, 69.33% a tla a, Mahabubabad chuan dawtin vote 65.05% a tla bawk a ni. Vote tlak chhiatna ber hi Hyderabad niin, vote 31.17% chiah a tla a ni. Tlai lam dar 3 thlenga vote tla tawh hi zawng zawng hi 51.89% a ni.