Afghanistan-in Delhi-a an embassy hawng leh dawn

New Delhi-a Afghanistan embassy chu tun aṭanga rei loteah hawn leh a ni dawn niin Afghanistan-a Taliban kaihhruai sorkara deputy foreign minister, Sher Mohammad Abbas Stanikzai chuan a sawi.

Minister hian Hyderabad leh Mumbai-a an palaite chuan Delhi-a an embassy an tlawh thu sawiin, Afghanistan chuan a ṭhenawm ramte nena inzawmna ṭha neih an duh thu a sawi bawk.

Zirtawpni khan Afghanistan-a Taliban-in rorelna an lak hmaa palaia an ruat, ambassador Farid Mamundzay chuan India sorkarin a thlawp ṭhat tawk loh avanga an embassy chu an kalpui chhunzawm theih loh thu leh, khar a nih tak thu a puang a, amah hi India ramah hian hun eng emaw chen a awm tawh lo a ni.

Kumin April leh May thla chho velah khan Afghan embassy-ah hian sorkar hmasa ruat ambassador Farid Mamundzay leh palai tur atana mawhphurna latu tur, Taliban ruat awm bawk chungchangah Afghan embassy chuan buaina a tawk chho ṭan a, mahse, Mamundzay hi ambassador chu a la ni chhunzawm tho a ni. India hian Afghanistan-a Taliban-te'n civil rorelna chhuh a, sorkar an siam chu a la pawmpui lo a, mi zawng zawng huap sorkar siam turin a la phut reng a ni.