COP28 tel turin PM Modi-a'n Dubai a thleng

Prime minister Narendra Modi chu sik leh sa chungchanga United Nations Conference of Parties, COP28 tia hriatin world climate action summit a neiha tel turin nimin khan Dubai a thleng.

Prime Minister hian ram ṭhang mekte chu sik leh sa inthlak danglam an hmachhawn a, hna an thawh ve theih nan, ram hmasawn tawh leh theihna nei zawkte chuan pui se a duh thu a sawi. COP28-ah hian sik leh sa inthlak chak lutuk ven dan tur te, greenhouse gas tihtlem dan turte sawiho a ni ang.

Modi hi Dubai-a India mi awmte chuan lo hmuakin,"Dubai-a India mi awmte'n min lo hmuak hi ka lawm tak zet a ni. Min thlawpna leh an phurna hian kan hnam inzawmna nghet leh thuk tak a tarlang a ni," tiin X-ah a post. India-in sik leh sa inthlak chungchanga a thawhpui ṭha tak, UAE president-na hnuaia COP28 summit neih a ni thei chu lawmawm a tih thu a sawi bawk.

PM Modi hi COP28 side events high level meeting pathumah a tel dawn bawk a, hengte hi climate finance leh green credit chungchanga hmalakna neih tawhte thlirhona a ni dawn a ni. Dubai-a a cham chhung hian PM hian summit-a tel ve, Israel president Isaac Herzog, UN secretary-general Antonio Guterres leh Maldive president thar, Mohamed Muizzu te pawh a mala kawm a tum thu tarlan a ni.