Health fund pe chhuak turin Mamata Banerjee-i'n PM a ngen

West Bengal chief minister, Mamata Banerjee chuan prime minister Narendra Modi hnenah lehkha thawnin, National Health Mission (NHM) hnuaia fund-te Bengal hnena pe chhuak vat turin a ngen.

Chief Minister Banerjee chuan fund kawl tan reng chuan mi rethei leh chan chhe zawk te'n hriselna chungchanga an hamṭhatna dawn tur an chan phah dawn bakah, nasa takin an tuar tih sawiin,"Union ministry of health and family welfare-in National Health Mission hnuaia fund a kawl tang tih ka hriat hian pawi ka ti hle. A chhan nia an sawi hi health and wellness centre enkawlna kawnga rawng hmanga thliar hranna (colour branding) chu Bengal-in an zawm loh vang niin an tarlang. Sorkar laipui hian health and wellness centre rawng pek hmanga thliarna dan hi paih se, thil dang zawng zawng ti vek siin Bengal chuan fund kan dawn lo phah a ni. Fund tel lo chuan mi rethei tam tak hian an hriselna ṭhat nana an hamṭhatna dawn tur an chan phah a ni," tiin a tarlang.

Banerjee hian West Bengal-ah health and wellness centre hawn tawh 11,000 vel a awm thu leh, ni tin mi nuai 3 chuangin an hman ṭangkai thu te, an building-te chu 2011-a Trinamool Congress-in sorkarna an siam hnua din a nih thu leh, state ruahman anga a thliar hranna tur rawng pek vek a nih thu a sawi bawk. "Bengal hi NHM hnuaia mipui tana hriselna lam hawi hun siam nasa ber kan ni a, kan tum ber chu mipuite tana ban phak, pan awlsam leh inenkawlna ṭha ber a thlawna pekna hmun siam a ni," a ti.

Sorkar laipui hian health centre chungchanga inkaihhruaina a siamah building-te chu a eng, khaki rawnga a tlang chei a nih tur thu an tarlang a, hetih lai hian West Bengal-a health centre te hi a pawl leh a var rawnga chei an ni hlawm a ni.