J&K inthlan nei tura an inpeih thu Lt. Governor-in sawi

Jammu & Kashmir lieutenant governor, Manoj Sinha chuan Election Commission-in a ruat hun hunah J&K Union Territory chu inthlan nei tura an inpeih thu a sawi. Sinha hian assembly inthlan neih a nih hma chuan J&K chhuahsan a tum loh thu a sawi bawk.

Lt. Governor Sinha hian Amar Ujala buatsaih 'Samvaad' press conference-ah thu sawiin,"J&K-a inthlan neih chungchanga ECI-i'n an hriat duh ang ang chu kan hriattir vek tawh. Helai hmunah hian ECI-in ruahmanna a siam hunah hunah J&K chuan inthlan nei turin kan inpeih tawh a ni tih ka sawi duh," tiin a sawi. J&K-a inrelbawlna kalpui a nih dan chungchangah assembly inthlan chu Election Commission of India thuneihna leh thu tawp siam theitu an nih thu sawiin, J&K-a party hruaitu ṭhenkhat chu dawt hmanga mipui fuihpawrh ṭhinah a puh.

"Helaia ka rawn kal a, ka hna ber chu ramin dan kan neihte Jammu & Kashmir-a kenkawh a nih theih nan a ni a, chu chu a puitling tawh, ka hna hi ka hlen tawh a ni. Firfiak hotu lu ber berte thah an ni tawh a, la dam awmchhunte pawh thah an ni vat ang. Firfiaka chetna hi kan do zel dawn a ni," tiin army, CRPF leh police te thawhhona a ṭhat thu a sawi bawk.