State 4 Assembly inthlan result puang : State 3-ah BJP leh state 1-ah Congress chak

November thla chhunga state assembly inthlan neihna zinga pali - Chhattisgarh, Madhya Pradesh, Rajasthan leh Telangana-a vote tlate chu nimin zing dar 8 aṭang khan chhiar a ni a, BJP an che ṭha leh hle. BJP hian Congress sorkarna state pahnih - Chhattisgarh leh Rajasthan-ah hnehna changin, an sorkar mekna Madhya Pradesh-ah an chak chhunzawm leh. Telangana-ah Congress party chuan rorellai, Bharat Rashtra Samithi (BRS) an hneh ve bawk.

Chhattisgarh-ah hian November 7 leh 17 khan vote thlak a ni a, vote 76.31% a tla. Madhya Pradesh-ah November 17-ah vote thlakin vote tla hi 77.15% a tling. Rajasthan-ah November 25-ah vote an thlak a, vote tla zat hi 74.62 niin, Telangana-ah November 30 khan vote thlak a ni a, vote 70.60% a tla.

Prime minister Narendra Modi chuan Chattisgarh, Madhya Pradesh leh Rajasthan inthlan result chuan mipuiten BJP-in inrelbawlna ṭha leh hmasawnna a kalpuina an thlawpzia a tilang a ni, a ti. Heng state pathum mipuite chungah lawmthu sawiin, an tan theihtawp an chhuah zel dawn tih a sawi a, hnehna an chan theihna atana thawktu party worker tinte chungah lawmthu a sawi bawk.

Congress President-in INDIA Bloc meeting ko

Congress party president, Mallikarjun Kharge chuan Telangana mipuite hnenah an party rintawkna an lantir avangin lawmthu a sawi a, hemi rual hian state dang pathuma an party dinhmun chu a lungawi thlak loh hle tih a sawi. Mahse heng state-ahte hian dinhmun ṭha zawk chang turin an intuaithar chho leh nghal dawn tih a sawi. Congress President hian Nilainiah a chenna inah eptu ṭangrual pawl, INDIA meet a ko nghal bawk a ni. INDIA hian meeting an neih hnuhnung ber chu thla thum liam taah khan a ni.

Chhattisgarh :

Chhattisgarh hi tun ṭum inthlana phase khat aia tama inthlang awmchhun an ni a, phase hnihah inthlanna hi neih niin seat 90 a awm a, sorkarna siam tur hian seat 46 neih a ngai a ni.

Kum 2018 inthlanah khan Bhupesh Bhagel kaihhruai Congress party chuan seat 68 lain, kum 15 hnuah a ṭum khatna atan Chhatisgarh-ah hian BJP tel lohna sorkar an siam a ni. Hemi ṭum hian BJP chuan dawtin seat 15 an la ve bawk. Party hrang hrang thawkho, Janta Congress Chhattisgarh chuan kum 2018 inthlanah hian seat 5 an la

Kumin inthlanah hian hriat theih chinah BJP chuan seat 30 la tawhin, seat 24-ah hma an hruai mek a, Congress chuan seat 18 lain seat 17-ah hma an hruai bawk.

Madhya Pradesh :

Madhya Pradesh assembly-ah hian seat 230 awmin kum 2018 inthlanah Congress chuan seat 114 lain party mala seat la hnem ber an ni a, independent candidate ṭanpuinain sorkar an siam a ni. Congress sorkarah hian Kamal Nath chu Madhya Pradesh chief minister a ni. Congress hnaih bertu chu BJP niin seat 109 an la ve bawk. Madhya Pradesh-a Congress sorkar hnuaia MLA ṭhenkhat chhuak avangin 2020 khan Shivraj Singh Chouhan kaihhruai BJP chuan sorkarna an siam chhunzawm a ni.

Hriat theih chinah kumin inthlanah hian BJP chuan seat 116 la tawhin, seat 48-ah hma an hruai mek a, Congress chuan dawtin, seat 35 an la tawh a, seat 30-ah hma an hruai thung. Bharat Adivasi Pary - BHRTADVSIP chuan seat khat an la ve bawk. Madhya Pradesh-ah hian sorkarna siam turin seat 115 lak a ngai a ni.

Rajasthan :

Rajasthan-ah hian assembly seat 200 awmin kuminah hian Congress candidate pakhat thihna avangin seat 199-ah inthlanna neih a ni. Kum 2018 inthlanah khan Ashok Ghelot kaihhruai Congress chuan seat 100 lain Bahujan Samaj Party nen thawk dunin sorkar an siam a, BJP chu eptu party lian ber niin seat 73 an la ve bawk.

Kumin inthlanah hriat theih chinah Rajasthan-ah hian BJP chu seat 114-ah chak tawhin, seat 1-ah hma an hruai mek bawk a, Congress chuan seat 67 la ve tawh bakwin, seat 2-ah hma an hruai ve bawk. Party dang, BAP, chuan seat 3 la ve tawhin, BSP chuan seat 2 an la bawk a, Independent-a chak 7 an awm bawk.

Rajasthan hi sorkar siam nawn theih lohna, swing state nia sawi a ni ṭhin. Kum 1993 aṭang khan political party, term hnih a zawna sorkarna siam thei an la awm lo a, BJP leh Congress an in sorkar chhawk ṭhin. Kuminah pawh BJP chuan Congress an thlak ve leh dawn ta a ni. Hemi rual hian tun ṭum inthlanah hian chief minister Ashok Gehlot leh a deputy hlui, Sachin Pilot te inkar buaina chuan rorellai, Congress party-in an chhiat pui nia ngaih a ni bawk.

Telangana :

Seat 119 awmna Telangana assembly-ah hian kum 2018 khan BRS chuan seat 88 lain sorkarna an siam a, Congress-in seat 19 an la ve bawk. Telangana hi regional party ṭhatna hmun a ni a; national party, Congress emaw BJP pawh an ṭha ngai lo a ni.

Kumin assembly inthlanah erawh hriat theih chinah Congress an rawn che ṭha hle a, seat 56 la tawhin seat 8-ah hma an hruai mek a, BRS hian seat 32 an la tawh thung a, seat 7-ah hma an hruai bawk. BJP chuan seat 7 la tawhin, seat 1-ah hma an hruai a, AIMIM chuan seat 2 lain seat 5-ah hma an hruai bawk a ni. Chief minister K Chandrasekhar Rao chuan an party chak loh chu an pawm thu a puang tawh bawk.