BJP-in state 12-ah sorkarna an siam ta : State 4-a ṭangrual sorkarah an tel bawk

November thlaa state assembly inthlan neihna, state panga - Chhattisgarh, Madhya Pradesh, Mizoram, Rajasthan leh Telangana inthlan result te a chhuak kim ta. Central-a rorel lai, BJP chuan Hindi hmanna state-ah an dinhmun an sawh ngheh belh zel. Nakkuma Lok Sabha inthlanpui neih tur atan pawh an dinhmun a siam ṭhat phah zual rin a ni.

BJP hian Congress party sorkar mekna, Chhattisgarh leh Rajasthan-ah hnehna changin Madhya Pradesh-ah an chak chhunzawm leh bawk. Hnehna an chan thar lehna state pathumte telin, BJP sorkarna state hi 12 an tling dawn ta. BJP sorkarna chu - Uttar Pradesh, Madhya Pradesh, Rajasthan, Gujarat, Assam, Chhattisgarh, Haryana, Uttarakhand, Tripura, Manipur, Goa leh Arunachal Pradesh te an ni. Heng bakah hian Maharashtra, Meghalaya, Nagaland leh Sikkim-ah ṭangrual sorkarah an tel bawk.

BJP sorkarna state-ahte hian ram mipui awm zat aṭanga 41% chuang an awm a, party dangte nena ṭangrual sorkar an siamna nen hian mipui 50% chuang awmnaah sorkarna fawng chelhtuah an ṭang mek a ni.

Hetih lai hian Congress party hian state pathum - Karnataka, Telangana leh Himachal Pradesh-ah sorkarin, heng state pathumah hian ram mipui awm zat aṭanga 8.521% chauh an awm pha. Bihar leh Jharkhand-a ṭangrual sorkarah tel bawkin, hei hi chhiar telin sorkarna siamtu zinga an telna hian ram mipui awm zat aṭanga 19.84% a huam.

Eptu ṭangrual pawl, INDIA-a national party lian ber, Congress hian Rajasthan leh Chhattisgarh-ah sorkar an hum zawh loh avangin ṭangrual pawl an thunun theihna pawh a nghawng phah deuh rin a ni. INDIA-a an thawhpui, West Bengal-a rorel lai Trinamool Congress thupuangtu Kunal Ghosh chuan tun ṭum inthlan result chu BJP hlawhtlinna vang ni loin, Congresss hlawhchham vang zawk a ni, a ti.

Tunge Rajasthan CM thar tur ?

BJP-in Rajasthan-ah Congress hnehin sorkar thar an siam dawn a, chief minister tur pawh ruat fel thuai a nih rin a ni.

Party hotute chuan Chief Minister candidate tur hi an la puang lo a, CM atan hian mi paruk hming sawi lan a ni. An zingah hian chief minister hlui, kum 70 mi Vasundhara Raje hming chu a langsar deuh ber. A kaihhruaina hnuaiah Rajasthan-ah hian BJP chuan inthlanah ṭum hnih hnehna an lo chang tawh. CM ni thei tura sawi lan dangte chu - union minister Gajendra Singh Sekhawat, tun ṭum inthlana BJP campaign-na kawnga thawh hlawk tak; Jaipur royal family member Diya Kumari, kum 2019 inthlanpuia vote nuai 5.51-a a khingpui hneh thei; spiritual leader leh Alwar MP Baba Balaknath; BJP veteran, 'Doctor Sabah' leh 'Baba' tia hriat lar Kirodi Mal Meena bakah Rajasthan BJP state unit chief CP Joshi te an ni.

BJP CM ni rei thei ber Shivraj Singh Chouhan

Madhya Pradesh inthlana chief minister Shivraj Singh Chouhan kaihhruaiin BJP chuan hnehna an chang leh a, Chouhan chu ram chhunga BJP chief minister ni rei thei ber a ni.

Kum 64 mi, Shivraj Singh Chouhan hi kum 2005 - 2018 chhung khan Chief Minister a ni tawh a, Madhya Pradesh CM ni rei thei ber a lo ni tawh bawk. Kum 2018 inthlanah Congress party an hneh lo a, mahse, kum 2020-ah Congress sorkar a tlak leh tak avangin BJP sorkar chuan sorkar siam lehin, CM atan lak luh a ni leh ta a ni a, tun ṭum inthlana an chak leh tak avangin Chief Minister a nih chhunzawm leh dawn ta a ni.

Chhattisgarh-a BJP MLA thlan tharte'n meeting nei

Chhattisgarh-ah BJP-in rorel lai Congress hnehin sorkar thar an siam dawn a, nimin khan BJP MLA thlan tharte chuan Raipur-a state party headquarters-ah meeting an nei.

BJP MLA thar 54-te chu meeting-ah hian an kim vek a, BJP in-charge Chhattisgarh Om Mathur leh union health minister Mansukh Mandaviya-te'n an telpui a ni. Meeting-ah hian legislature party meet neih dan tur an relho ang.

Chhattisgarh inthlanah hian chief minister Bhupesh Bhaghel kaihhruai Congress sorkara minister 13 zinga pakua an chak zo lo a, an zingah hian deputy chief minister TS Singh Deo leh home minister Tamradhwaj Sahu-te bakah, state unit chief Deepak Baij-te pawh an tel.

Telangana Congress hruaitute'n Governor an hmu

Telangana assembly inthlanah Congress party chuan assembly seat 119 awmah seat 64 lain party malin sorkarna an siam thei dawn a, party hruaitute pawhin state governor Tamilisai Soundararajan hmuin sorkarna an siam theih thu an hrilh tawh.

Congress MLA thlan tharte hian vawiinah meeting neiin, legislature party hruaitu tur an thlang dawn a ni.

Telangana chief minister thar tur hi ruat a la ni lo a, PCC president Anumula Revanth Reddy chu CM tura rin a ni. Kum 54 mi, Reddy hian kum 2017 khan Telugu Desam Party (TDP) aṭangin Congress party hi a zawm a, tun ṭum inthlanah khan Kodangal constituency-ah thlan tlin niin, amah hnaih bertu BRS candidate Patnam Narender Reddy chu vote 32,000 in a hneh.

National party chet ṭhat theih lohna nia sawi ṭhin, Telangana-a regional party Bharat Rashtra Samiti (BRS) in kum 10 dawn ro an relna chu Congress party hian a rawn tihtawpsak ta a ni. K Chandrasekhar Rao pawhin chief minister a nihna aṭangin banna a theh lut tawh bawk a, mahse, sorkar thar siam hma chu a hna hi chelh chhunzawm tura tih a ni.