Cyclone Michaung avangin Chennai-ah mi 8 thi

Bay of Bengal tuipuia cyclone Michaung thawk mek avangin Thawhṭanni khan Tamil Nadu-ah mi pariatin nunna an chan a, Andhra Pradesh-ah a thawk chhunzawm dawn nia sawiin, sorkar chuan state chhunga district pariat; Tirupati, Nellore, Prakasam, Bapatla, Krishna, West Godavari, Konaseema leh Kakinada te tan inralrinna tur thu a chhuah.

Cyclone Michaung avang hian Tamil Nadu leh Andhra Pradesh hmun ṭhenkhatah chuan Thawhṭanni khan ruah nasa tak surin, thli leh ṭekte a thawk bawk. Tamil Nadu-ah thlipui tlehin chhiatna a thlenah thi pariat an awm a, tui tling nasa avangin Chennai airport chu khar lailawk a ni a, nimin khan Chennai-a lut leh chhuak tur thlawhtheihnate fimkhur thilah dintir an ni. Indigo chuan an thlawhtheihna 550 leh Vistara chuan an thlawhtheihna 10, Chennai aṭanga chhuak turte chu cancel a nih thu an puang.

Indian Meteorological Department (IMD) chuan Tamil Nadu hmar lam leh Puducherry-ah te chuan ruah nasa vak lo la thawk chhunzawm tur niin an sawi. Hetih lai hian hmar zawnga kal cyclone hian Andhra Pradesh thlengin, tuipui kam khuaa khawsa mi 910 te chu thuneitute chuan an sawn chhuak tawh a, district pasarih huam chhunga mihring an sawn chhuah tawh zawng zawng chu 9,454 an tling tawh niin an sawi. Andhra Pradesh chief minister, YS Jagan Mohan Reddy chuan thuneitute chu chhanchhuah hna thawk thei tura inring reng turin a hriattir tawh bawk. Reddy chuan cyclone tuartu district tin atan special officer ruat an nih thu leh, relief camp 300 chuang an siam tawh thu te, chhanchhuahna leh chhawmdawl hna thawhna atan Rs. vbc 2 ruahman a nih thu a puang bawk. Union home minister Amit Shah pawhin National Disaster Response Force (NDRF) team khat an tirh tawh thu leh a dang an tirh belh tur thu te, sorkar laipuiin theihtawpa a ṭanpui tur thu te Tamil Nadu, Andhra Pradesh leh Puducherry sorkar hnenah a hriattir tawh a ni.

IMD Director General chuan Andhra Pradesh tuipui kam khuate chuan ruah nasa tak, 30-40 mm inkar an dawn tur thu sawiin, hmun ṭhenkhatah chuan ruah sur hi 65 mm aṭanga 115.5 mm a tlin theih tur thu a tarlang. Cyclone Michaung chu thli, darkar khata km 90-100 inkara chaka a thawh tur thu leh, a chak lai bera dakar khata km 110-a chak a nih theih tur thu a sawi. Andhra Pradesh chhim lama hmun hniam laite chu tuiin a tibuai hle dawn niin thuneitute chuan sawiin, mipuite chu fimkhur tur leh, nunna chan an awm lohna tura anmahni sahimna atana pawn chhuak lo turin an chah bawk.