INDIA-in meeting an neih hun tur sawn

Eptu party ṭangrual pawl, INDIA chuan vawiina Delhi-a meeting an neih tur chu hun remchang zawk atan an sawn thu an puang. Meeting hi Congress president Mallikarjun Kharge-a'n koin, meeting ṭhulh a nih chhan erawh tarlan a ni lo.

INDIA meeting ṭhulh a nih hma hian an pawla tel, Bihar chief Minister, Nitish Kumar leh Samajwadi party hruaitu, Akhilesh Yadav te chuan an tel theih loh tur thu an sawi a, Thawhṭanni khan West Bengal chief minister, Mamata Banerjee chuan meeting a tel theih loh tur thu a sawi ve bawk. Anni bakah hian Tamil Nadu chief minister, MK Stalin pawh an state-in cyclone Machaung a tuar avanga a tel theih loh tur thu a sawi niin report ṭhenkhat chuan an tarlang.

Meeting ṭhulh a nih chhanah hian tun hnaia assembly inthlan result chhiar neihna state pathuma Congress-in hnehna an chan zawh loh vang niin ṭhenkhat chuan an sawi a, hetih lai hian INDIA-a tel party ṭhenkhat chuan Congress chu thawkho tur an nih laia party mal anga thil an kalpui luih avanga INDIA thawhhona pawh chhe hret hretah an puh. INDIA-in meeting an neih hnuhnun ber chu August thla tawpa Mumbai-a meeting an neih kha a ni tawh a ni.