India-a khawpui him ber atan Kolkata puang leh

National Crime Records Bureau (NCRB) chuan report tichhuakin a zawna a kum thumna atan Kolkata chu India khawpui zinga him berah puan a ni. Kolkata hi NCRB-in khawpui him an tehnaa mihring nuai khat zela thubuai chhui zui ngai (Cognizable offence) tlemna ber niin an tarlang.

Kolkata-ah hian kum 2022 chhung khan mihring nuai khat zelah thubuai chhui zui ngai 86.5 awm anga chhut a ni a, hei hi kum 2021-ah chuan 103.4 a ni thung. Kolkata dawtah hian Pune (280.7) leh Hyderabad (299.2) te an awm a ni. 2021-ah khan Pune hian mi nuai khat zelah cognizable offence 256.8 neiin, Hyderabad hian 259.9 an nei ve bawk.

Khawpui him tehnaa list an siamah hian India rama khawpui sawmpakua, mi nuai 20 chuang awmna an zir chianna dah a ni. Kolkata-ah hian tharum thawhna rapthlak tak ang chi pawh tla hniamin, kumin chhung hian hetiang kaihhnawih case hi 34 chiah an nei a ni.

Hetih lai hian Kolkata-ah hian hmeiche laka pawikhawihna a pung thung a, kum 2021-a case 1,783 awm chu 2022-ah chuan case 1,890 an nei.