Rajasthan-a assembly seat khat atan inthlanna neih hun tur puang

Election Commission chuan November 15-a Rajasthan assembly inthlan neih a nih ṭuma Congress candidate thihna avanga Karanpur constituency-a inthlan a ṭhulh chu nakkum January 5, 2024-ah neih a nih tur thu a puang.

Karanpur seat inthlanna neih tur atan hian December 12-ah nomination theh luh hun hawn ṭan a ni ang a, December 19 thleng nomination siam theih a ni ang. Inhnuhdawhna hun hnuhnung atan December 22 ruat a ni bawk. Vote hi January 8-ah chhiar a nih tur thu Election Commission chuan a tarlang bawk.

Election Commission chuan Representation of the People Act section 52 ṭan chhanin, inthlan hmaa recognised state party emaw national party candidate emaw thi an awm chuan returning officer-in inthlan a ṭhulh ang a, hun dang a ruat tur thu an tarlang. Representation of the People Act, 1951 hnuaia section 52(2) chuan election Commission chu candidate thi awmna party-te hnenah candidate dang siam tura hriattir tura thuneihna an neih thu leh party-te chuan ni sarih chhunga candidate dang an siam tur a nih thu an tarlang bawk a ni.