Ram pathum tlawh turin PM zin chhuak

Prime Minister Narendra Modi chu ram pathum tlawh turin nizan khan a zinchhuak.

PM Modi hian Belgium khawpui, Brussels panin, India-EU Summit a hmang dawn a ni. A cham chhung hian Belgium Prime Minister Charles Michel kawmin firfiaka chetna thleng dolet dan turte an sawidun ang. Kar hmasa khan firfiakte chuan Brussels-a airport leh metro station-te an lo bei tawh a ni.

India-EU summit hi hun eng emaw chen tihkhawtlai a ni tawh a, summit neih hnuhnun ber chu kum 2012 kha a ni tawh a ni. He summit hi EU leh India ram thawhdunna nghet zawk siam dan a ngaihtuah a, kumina summit-ah pawh hian sumdawnna lama thawhdunna tur thuthlungte an duan beisei a ni.

Brussels-a a cham chhungin PM Modi hian sumdawng aiawhte a hmu dawn bawk a, India mi awmten inkhawm an buatsaihah thu a sawi bawk ang. Belgium MP-te pawh hmuh a tum bawk.

Modi hian Brussels aṭangin Washington a pan dawn a, March 31 leh April 1-a 4th Nuclear Security Summit (NSS) a hmang dawn a, he hunah hian nuclear security chungchanga rawtna a neihte a puang nghal ang.

Saudia Arabia lal, King Salman Bin Abdulaziz Al-Saud-an zin tura a sawm angin, PM hian Washington aṭangin April 2 hian Saudi khawpui, Riyadh a pan dawn a, ni hnih a cham dawn a ni.