Pakistan Team-in Pathankot base an thleng

Pakistan firfiakten Pathankot Air Force base an beih dan chhui tura rawn kal, Pakistan Joint Investigation Team (JIT) chu nimin khan Pathankot base-ah hruai an ni.

Member panga awmna, Pakistan JIT-ten Janua-ry 2-a firfiakten an beih avanga sipai pasarih an thih phahna, Pathankot base-a hruai an nih lai hian airbase pawn lamah Congress leh Aam Aadmi Party (AAP) activist-te chuan lungawi lohna an lo lantir a ni.

Congress party worker-te chuan Pakistan JIT chu an rama kir leh tura an duh thu ziahna flag leh banner-te an lo keng a, an limte pawh an lo hal a ni. AAP activist-te chu Delhi Minister Kapil Mishra-an a ho bawk a, Pakistan intelligence agency, ISI leh BJP chu thawkdunah puhin, Mishra chuan, "Modi-an India hi hmusitawm taka a dah kan phal dawn lo. Kan himna dahkhama game a khelh kan remti lo. Engvangin nge Modi hian ISI hi duhsak taka a lo dawnsawn?" a ti.

Pakistan team hi Ja-nuary 2-a firfiak paruk leh security force-te inkahna hmunte entir an ni. Mahse base chhunga hmun ṭhenkhat erawh chu an kal phalsak a ni dawn lo tih Defence Ministr Manohar Parrikar chuan a lo sawi tawh a ni. Firfiakten India an rawn luhna kawngte entir turin Paksitan team hi ramri hrulah pawh hruai tum an ni bawk. Damdawi-ina firfiakte ruang dah pawh entir an ni bawk ang.