Hyderabad university zirtirtuten a huhoin chawlh la

Hyderabad University-a zirtirtu 50 chuang chuan campus chhunga zirlai nawrh huaihawtte chunga police-te chetdan leh, vice chancellor P Appa Raa kir leh an duh lohna lantir nan nimin khan a huhoin chawlh an la.

Univesity zirlaite hian hostel chhungah Dalit zirlai, Rohith Vemula a intihhlum chungchangah university vice chancellor Rao chu mawhphurtua puhin man turin an phut a, campus chhungah hun rei tak nawrh an huaihawt tawh a ni.

Rohith Vemula a thih hnu hian VC Rao hian thla hnih dawn chawlh a la nghal a, March 22 khan a hna hi zawm lehin zirlaite nen hian an innawr zui leh nghal a ni. Kar kalta Thawhlehni khan zirlaite chuan Rohith-a tana rorelna dik phutin nawrh an huaihawt a, VC Rao office pawh an luhkhung a ni. Rao hian police-te koin, police-te chuan zirlai nawrh huaihawtte hi kut thlakin an vau zui bawk nia sawi a ni. Tharum thawhna thleng vang hian March 28 thleng khan registrar chuan class a suspend a ni.

Rohith-a tana beitu, Joint Action Committee (JAC) for Social Justice chuan zirlaite chu lungawi lohna an lantir a nih pawhin an zirlai chhunzawm turin a ngen a, semester a tawp hnai tawh avangin an tana hun pawimawh tak a nih avangin an zirna tihbahlah phah nan hmang lo turin a ngen.