Sorkar laipuiin website 100 chuang a block

Ministry of Home Affairs chuan hna lem hmanga inbumna leh investment kalpui ṭhina hriat website 100 chuang an block thu a puang. Heng website-te hi ram pawn lam aṭanga kalpui leh, account lem te, inbiakna hmanrua chi hrang hrang hmanga hna lem tawktarha mi bum ṭhin nia hriat an ni.

MHA chuan website an block- te hi inrelbawlna mumal tak nei leh pawisa inlaksak zawnga pawikhawihna kalpui an nih thu sawiin, sum leh pai tam tham tak an mi bumte hnen aṭanga an lakte chu crypto currency hmang te, oversea ATM aṭang te, Fintech company leh card hmang tea India ram aṭanga an thawn chhuah ṭhin thu an tarlang.

Heng website te hian Google leh Meta hnuaia platform hrang hrang kaltlangin "ghar baithe job" (In aṭanga thawh theih hna) tih leh "Ghar baidhe kamai kaise karen" (Ina awm chunga hlawh neih dan) tihte hmanga infakin, ram hrang hrangah an inzuar kual ṭhin a, hna thawk tawh lo, hmeichhia leh ṭhalai part time-a hna thawh tur zawngte chu an bitum ber te an ni. Heng faknate hi an hmeh chiah hian agent-te'n Whatsapp emaw Telegram kaltlangin an be pawp nghal ṭhin a, hna awlsam tak; video like emaw subscribe bakah, eng emaw rating pe turin an hrilh ṭhin a ni. Hetianga an tih hnu hian pawisa tlemte pek an ni ṭhin a, chumi hnuah pawisa tlem invest a, hlawh tam zawk neihna tur kawhhmuh niin, an mi bumte rinna an hlawh hnuah pawisa tam zawk invest tirin, an pawisa invest-te chu tihtansak chhunzawm an ni ta ṭhin a ni tiin MHA chuan an thuchhuahah an tarlang.