Rajput hotu thah a nih vangin Rajasthan-ah kawng zawh

Shri Rashtriya Rajput Karni Seva national president leh Rajput hotu ni bawk, Sukhdev Singh Gogamedi chu December 5 khan kah hlum niin, Rajasthan police-te chuan Gogamedi thattu nia an hriatte hi an um zui mek niin an sawi. Gogamedi hi ama inah Thawhlehni khan kah hlum a ni.

Hetih lai hian Shri Rashtriya Rajput Karni Seva chuan an hruaitu, Gogamedi thattu man thuai tura phutin Jaipur-ah kawng an zawh a, Jaipur-a Khatipura road chu dan niin, an pawl mi leh sa eng emaw zat hi Gogamedi ruang dahna, Metro Mass hospital kawtah an pung khawm a ni. Jodhpur leh Udaipur-ah pawh nawrh huaihawt niin tharum thawhna erawh a thleng lo thung.

Shri Rajput Karni Sena national president, Mahipal Singh Makrana chuan state police-te chu demin, Rajasthan police DG chu Gogamedi venghim zo loah puhin bang tura a phut thu a sawi. Makrana chuan,"Sukhdev Gogamedi thah tum a nih thu hi Punjab police-te hnen aṭangin thu dawn a ni a, mahse, Rajasthan police-te hian venhimna an pe lo a ni. Hna ngaihthah avangin DG hi ban tur a ni," a ti. "Rajput hnamte chauh hi lungawi lo kan ni lo a, Sarv Samaj te pawh he thil thleng avang hian an lungawi lo a ni. Tualthattute hi man an nih loh chuan ram pumah nawrh hi huaihawt kan tum a ni," tiin a tarlang bawk.

Jaipur Police Com­missioner, Biju George chuan Gogamedi thattute hi Naveen Singh Shekhawat thattute tho an nih thu leh, a ina hruaitute nen, an vaia an hriat tawh thu leh an zawn mek thu a sawi. Tualthattu pakhat zawk hi Haryana mi niin, pakhat zawk hi Rajasthan mi a ni, a ti.