Adani Group laka kawngzawhah Uddhav Thackeray tel dawn

Shiv Sena (UBT) hruaitu, Uddhav Thackeray chuan December 16-a Mumbai-a Adani Group office pana Shiv Sena-te'n lungawi lohna kawngzawh an neih turah hma a hruai dawn tih tarlangin, sorkarin induhsakna uchuak tak a lantir chu an dodal tlat tur thu a sawi.

Maharashtra-a BJP kaihhruai sorkar hian Dharavi Redevelopment project chu Adani gruop firm hnenah a hlan a ni. He project khawih nan hian Rs. vbc 20,000 ruahman a ni a, Adani-te hian he project khawihna tur atana bidding neihah nikum November thla khan building sak hna khawih ṭhin DLF leh Naman Developers-te an hneh a ni.

Uddhav hian Asia rama slum lian ber, Dharavi sak ṭhatna tur atan July thlaa Maharashtra sorkarin a sa ṭha tura Adani group hnena project a pe chu induhsakna dik lo a ni tih sawiin,"Dharavi-a chengte ṭhat zawkna tur atan, Shiv Sena chuan December 16 hian Adani group office panin kawng kan zawh dawn," tiin a puang. Chief minister hlui, Uddhav Thackeray chuan state sorkar chu Dharavi mipuite aia Adani hlawkna tur ngaihtuah zawkah a puh a ni. Thla hmasa khan Congress pawhin induhsakna awma sawiin, Dharavi Redevelopment project thawk tur pek tawh chu sut leh turin sorkar an lo phut tawh bawk.