Telangana Chief Minister thar tur - Revanth Reddy

Telangana assembly inthlan neih zawh taka hnehna an chan hnuah Congress chuan state chief minister atan Telangana Pradesh Congress Committee president, Revanth Reddy chu an ruat thu an puang. Revanth Reddy hi vawiin hian chief minister atan lak luh a ni ang.

Telangana chief minister tur chungchang hi New Delhi-a All India Congress Committee-in press conference an neihnaah puan niin, general secretary, KC Venugopal chuan,"Congress observer hrang hrangte hnen aṭanga thu lak leh rawtna bakah, Karnataka deputy chief minister, DK Shivakumar te, Telangana party in-charge, Manikrao Thakare leh hruaitu dangte hnen aṭanga thurawn kan dawn angin, Congress chuan Reddy hi Congress Legislature Party leader atan a puang a ni," tiin a sawi.

Venugopal chuan Telangana mipuite tana an party-in a lo tiam tawh leh mipuite beiseina tihhlawhtlin chu an chak ber a nih tawh thu a sawi a, council of minister siam chu an hna hmasa a nih leh tur thu a sawi bawk. Telangana hian chief minister tiam loin cabinet minister 17 an nei thei a ni.

Revanth Reddy hi Telangana-a Congress Legislature Party (CLP) leader atan puan a ni a, Telangana-a Congress chief minister hmasa ber tur a ni ta a ni. Congress president Mallikarjun Kharge chuan chief minister tura pawmpuina hi a ziak tawh. Reddy hi November thlaa state assembly inthlan neih zawh takah khan Kodangal constituency aṭangin hneh taka thlan tlin a ni.