Lok Sabha-ah J&K kaihhnawih bill pahnih pass

Parliament winter session neih mekah Lok Sabha chuan Nilaini khan Jammu & Kashmir Reorganisation (Amendment) Bill, 2023 leh Jammu & Kashmir Reservation (Amendment) Bill, 2023 pass a ni.

Jammu & Kashmir Reorganisation (Amendment) Bill, 2023 hian Kashmir assembly-a seat awm zat chu tipungin, seat 107 aṭangin seat 114-ah tihpun a ni. Heng seat 114 aṭanga seat kua chu reserved seat ni tawhin; raltlan, Pakistan awp Kashmir aṭanga tlan chhia leh Scheduled tribe te tana reserved seat a ni ang. He bill hmang hian J&K Lt. Governor chuan assembly-ah member pathum; Kashmir-a raltlan zing aṭangin mi pahnih, pakhat hmeichhia leh Pakistan awp Kashmir aṭanga indona avanga tlan chhe zing aṭangin pakhat a nominate thei tawh bawk ang.

Jammu & Kashmir Reservation (Amendment) Bill, 2023 hmang hian J&K Reservation Act, 2004-a 'weak and underprivileged classes' tih chu 'other backward classes' tiha thlak a ni tawh dawn bawk. He dan hmang hian scheduled castes, scheduled tribe leh khawtlanga chan chhe zawkte chuan thiamna bik zir theihna zirna inah an tan hnathawh leh zirna atan reservation siam a ni ang.

Bill chungchang sawiho a nih hian inhnialna a chhuak a, eptu party MP ṭhenkhatte chu union home minister Amit Shah thusawi avangin house aṭangin an chhuak. Amit Shah hian Kashmir-a raltlante tana seat reservation siam chuan 1990 aṭanga mahni in leh lo tlansante'n an hnam leh chhungkaw tan an dikna leh chanvote an hum theih nan kawng a hawnsak tur thu a sawi. Shah chuan kum 2019-a J&K special status, Article 370 ṭhiah a nih hnuah firfiaka chetna te, ramria lut ru te, lung leh hmanraw hmanga invawmna ang chi te a tlakhniam thu sawi bawkin, eptu party-te chuan dan thar siamna tur chu dan awm sa Supreme Court-a khin mek a nih avanga thlak theih loh angin sawi mah se, court-in stay order a chhuah loh avangin thlak theih a nih thu a sawi bawk.