Cyclone Michaung tuarte ṭanpuina tur sorkar laipuiin a pe

Prime minister Narendra Modi chuan Ministry of Home Affairs hnenah cyclone Michaung avanga tuilian tuarte ṭanpuina tura sorkar laipuiin State Disaster Response Force (SDRF) kaltlanga 2nd instalment a pek tur chu advance-a pe turin a hriattir. Sorkar laipui hian Andhra Pradesh SDRF hnenah Rs. vbc 493.60 leh Tamil Nadu SDRF hnenah Rs. vbc 450 a pe dawn a ni.

Cyclone Michaung avang hian Tamil Nadu leh Andhra Pradesh hmun tam takin tuilian an tuar a, thlai tam tak a chhiat bakah thing tlu leh tui tling avangin inkalpawhna kawngpui tam tak a ping. Andhra Pradesh-ah chuan kawngpui chhe thui zawng hi km 70 a tling a, ran vulh ṭhahnem tak an thi tawh bawk. Andhra Pradesh CMO chuan khaw 194 aṭangin mi nuai 40 chuangin cyclone hi an tuar nia tarlangin, thingtlang khaw 25-a mihring chengte chu sawn chhuah an nih thu a sawi bawk. Chennai, Kancheepuram, Changelpet leh Tiruvallur khuate chuan cyclone hi an tuar na zual niin an tarlang.

Amit Shah chuan Prime Minister-in SDRF kaltlanga sorkar laipuiin ṭanpuina a pek tur thu hi a sawiin, 1st instalment chu a pe chhuak tawh niin X-ah a tarlang. Defence minister Rajnath Singh pawhin tuilianin a tihbuai khua leh cyclone hnuhmate thlawhtheihna hmangin survey a nei tawh bawk.