ED-in China smartphone siam lakah thubuai ziak lut

Enforcement Directorate (ED) chuan New Delhi special court-ah Nilaini khan Prevention of Money Laundering Act hnuaia criminal section hmangin pawisa chheprelh chungchangah China aṭanga lo lut vivo-India lakah thubuai theh lutin, company dang eng emaw zat lakah thubuai an theh lut tel bawk.

ED-te hian he thubuai kaihhnawihah hian mi pali an man tawh a, Lava international mobile company managing director, Hari Om Rai pawh a tel. Midang an mante hi China khua leh tui, Guangwen, Andrew Kuang tiha hriat, Chartered Accountant Nitin Garg leh Rajan Malik te an ni. ED chuan an mi mante hian vivo-India chu thil dik lo ti tura an puih thu leh, chu chu India sum leh pai dinhmun khawih chhe thei thil a nih thu an tarlang. Nikum July thla khan ED-te hian vivo-India hi an lo dap tawh a, pawisa chheprelh kaihhnawihah India company eng emaw zat leh China mi te an lo man tawh a ni. Hetih hunlai hian ED-te hian vivo-India chuan India-a chhiah awl ruk nan China lamah pawisa Rs. vbc 62,476 an thawn niin an sawi.

Police-in FIR an neih tlukpui, ED-in Enforcement Case Information Report (ECIR) an tih theh luh a nih thu an sawi. Vivo-India thawhpui hi Grand Prospect International Communication Pvt. Ltd. (GPICPL) niin, an director, share neite leh mi thiam dangte an tel. Police hnena thubuai theh luttu hi Corporate Affairs Ministry niin, GPICPL leh share neitute chu nihna lem siam chawp hmang leh address lem hmangah an puh a ni.