Sorkar laipuiin nakkum March thleng purunsen thawn chhuah khap

Sorkar laipui chuan ram chhunga purunsen stock a tam theih nan leh purunsen man sang tur ven nan nakkum March thleng ram pawna purunsen thawn chhuah khap a nih thu a puang. Tun dinhmunah purunsen man hi Delhi-ah chuan kg. 1 cheng 70 aṭanga 80 inkar a ni.

Directorate General of Foreign Trade (DGFT) chuan,"Purunsen thawn chhuak tura dan hman lai chu tihdanglam niin, nakkum March thleng thawn chhuah khap a ni," tiin an tarlang. DGFT chuan purunsen thawn chhuah chu phal ni lo mah se, hriatthiamna nena ngenna an dawn dan a zirin sorkar laipui chuan phalna pe chhuakin thawn chhuah tur a ruahman thei ang tiin a tarlang thung. Thuchhuah siam hmaa thawn chhuah tura puahchah vek tawh te, thawn chhuah tura bill tihfel tawh te, purunsen la tura India lawng chawlhnaa lawng lo thleng tawh leh an phur chhuah hun tihfel tawhte chu he khapna hian a huam loh tur thu leh, ruahmanna siam tawh china telte chu nakkum January 5 thleng ngaihhnathiam an nih tur thu an sawi bawk.

Sorkar laipui hian October thla khan purusen man sang tur ven nan stock awm sa chu man tlawm zawkin a lo zuar chhuak tawh a ni. Hei bakah hian purunsen thawn chhuak tura Minimum Export Price (MEP) chu purunsen ton khat thawn chhuah turah USD 800 zelin a lo tipung tawh bawk a, hei hi kumin December 31 thleng hman tura ruahman a ni.

Kumin April 1 leh August 4 inkar khan purunsen ton nuai 9.75 chu ram pawn lamah thawn chhuah a ni a, India aṭanga purunsen la lut tam ramte chu Bangladesh, Malaysia leh UAE te an ni. WPI data tihchhuah aṭanga a lan danin thlai chawhmeh leh alu man sanna te a tlakhniam laiin purunsen man hi October thlaah pawh 62.60% zetin a la san belh a ni.