Parliament aṭangin Trinamool MP Mahua Moitra suspend

Amah hmu duhte hnen aṭanga pawisa la hmasa ṭhina puh, West Bengal Trinamool Congress Lok Sabha MP, Mahua Moitra chu Parliament thlasik inkhawm neihnaah Ethics committee hnen aṭanga a chungchang report ngaihthlak a nih hnuah suspend a ni.

Mahua Moitra hi amah hmu duhte hnen aṭanga pawisa la ṭhin bakah, thilpek man tam, sumdawng Darshan Hiranandani hnen aṭanga Rs. vbc 2 chuang hu laa puh a ni bawk. Motira hi Narendra Modi kaihhruai BJP sorkar laka zawhna khirkhan tak tak siam a, sorkar rorelna chungchang zawhna harsa nei ṭhin tura inremsiamna neiah an puh bawk a, hei bakah hian Parliament-a confidential account-a luh theihna chu Hiranandani hnenah hian pea puh ni bawkin, Hiranandani hian Modi sorkar sawiselna atan zawhnate amah ngeiin a siam ṭhin niin Ethics committee report chuan a tarlang.

A chungchang thu ngaihtuah a nih dawn hian Mahua Moitra hi Parliament-ah thusawi phalsak a ni lo a, Lok Sabha speaker, Om Birla chuan 2005-a MP 10 suspend an nih tawh dan enin, an chungchang thu ngaihtuah lai MP-te chuan house chhunga thusawi theihna an hloh tawh a ni, a ti. Hetih lai hian Moitra hian Harinandani hnena confidential account luhna tur pea an puhna hi a pawm thu sawiin, thamna laa an puhna erawh a pha thung.

Ethics committee hian session neih inkarah Mahua Moitra puhna chungchang hi zir chiangin, Parliament thlasik inkhawmah hian Mahua Moitra hi Lok Sabha aṭang hian suspend turin an rawt a, sorkar laipui hnenah Moitra-i dik lo tak leh dan pela a chetna nia sawi hi dan dik tak hmanga chhui chian an rawt nghal bawk a ni.