Qatar-a India mi thi tura an chungthu relte India palaiin hmu dawn

Qatar-a India ambassador hnenah Qatar-a India mi 8 thi tura an chungthu relsakte hmuh phalna pek a nih thu Ministry of External Affairs (MEA) chuan a tarlang. An vai hian Doha-ah hren mek an ni.

MEA thupuangtu, Arindam Bagchi chuan,"An chhungte duh dan angin appeal kan siam tawh a, an chungthu hi November 30 leh November 23 khan ngaihtuah a ni tawh a ni. Hearing hi neih leh vat a ni dawn a, he thubuai hi kan theihtawpin kan vil reng a, dan leh inpalai tawnna hmanga kan tih theih zawng zawng pawh kan ti zel a ni. Kan ambassador pawhin heng mi 8-te December 3-a hmu tura phalna hi a hmu tawh a ni," tiin a sawi. Bagchi chuan PM Modi leh Qatar Emir, Tamim Bin Hamad Al Than pawhin COP28 neih mek karah Qatar-a India mi awmte himna leh khawsakna chungchang an sawi dun tih a tarlang bawk.

Mi pariatte hi Indian Navy aṭanga bangte an ni a, Indian Navy aṭanga an ban hnu hian Qatar-a Al Dahra company-ah an thawk a ni. Al Dahra hian ralthuam siamna lam an khawih ber a, ram himna atana pawi thei khawl an siam avangin August 2022 khan man an ni ta a ni. Man an nih hnu hian Qatar court of first instance chuan kumin October 26 khan thi turin an chungthu a relsak. Heng mi pariatte bail dilna hi Qatar court chuan a lo hnawl tawh bawk a ni.