Covid-19 kai nuai 19 chuang an dam tawh Hri kai hmuh chhuah thar aiin dama puan an tam
Ministry of Health and Family Welfare-in nimina report an tihchhuahah ramchhung hmun hrang hrangah Covid-19 kai hmuh chhuah thar 57,981 an awm leh a, nimin thleng khan hri kai 26,47,663 an awm tawh. Ni eng emaw zat chhung ni khata hmuh chhuah thar sing ruk chuang an nih hnuah nimin hian tlemin hmuh chhuah thar zat hi a tla hniam ve leh hret a ni.
Hri kai hmuh chhuah thar hi tam ṭhin hle mah se enkawl dam pawh an tam tawh hle a, nimin khan 57,584 chu dama puan leh niin hri kai hmuh chhuah thar aiin dama puan hi an tam zawk. Covid-19 kai zinga 19,19,842 lai chu an dam leh tawh a, enkawl dam tawh rate hi 72.51% a tling tawh. Hetihlai hian mi 941 laiin darkar 24 chhungin an thihpui leh a, Covid-19 vanga thi hi India ramah 50,921 an awm tawh a, hri kai mek 6,76,900 an la awm bawk.
Sample Vbc 3 chuang endik tawh
Indian Council of Medical Research (ICMR) chuan nimina report an tihchhuahah Covid-19 sample 7,31,697 an endik leh tih tarlangin hri len ṭantirh aṭanga nimin thleng khan sample 3,00,41,400 lai an endik tawh a ni.
ICMR hian sample endikna atana laboratory pawmpui 1470 an nei tawh a, sorkar laboratory 969 leh private laboratory 501-ah sample endik hna hi an kalpui tih an tarlang.
Railways in coach 5,231 CCC atan hmang
Indian railways chuan air- condition coach ni lo coach 5,231 lai chu isolation coach atan hmangin Covid Care Centre (CCC)-ah an hmang. Heng CCC atana coach an hman te hi mild case leh symptoms lang mang lo tak takte enlawna atan an hmang a ni.
Railways hian Delhi, Uttar Pradesh, Andhra Pradesh, Telangana leh Madhya Pradesh-ahte chuan COVID Care coach 960 an dah a, heng zinga 503 lai hi Delhi-ah an hmang.
India dinhmun
India hi khawvel ram hrang hrang zinga hri kai tam ram pathumna a la nih chhunzawm zel a, ni eng emaw zat chhung chu US leh Brazil aiin ni khata case thar awm zat a tam tawh zawk bawk.
January 30 khan Kerala-ah Covid-19 case hmasa ber hmuh chhuah niin heta ṭanga ni 200 a ral meuh chuan mi nuai 26 chuangin hri an kai tawh a ni. August 6 khan hri kai nuai 20 chuang an awm tawh a, tun thla chhung ringawt hian hri kai hmuh chhuah thar nuai 10 vel an awm tawh.