Chhattisgarh Chief Minister atan tribal leader thlang

Chhattisgarh assembly inthlan neih zawh taka hnehna changtu, Bharatiya Janata Party (BJP) chuan state chief minister atan tribal leader, Vishnu Deo Sai a ruat.

Nimin khan Chattisgarh Legislature Party meeting hi neiin, an hruaitu tur hi an thlang a ni. Hetih lai hian BJP-in sorkar thar an siamna tur state dang, Madhya Pradesh leh Rajasthan-ah erawh chief minister tur hi ruat fel a la ni lo thung.

Kum 59 mi, Vishnu Deo Sai hi kum 2020-2022 chhunga Chhattisgarh-a BJP state president a ni a, Sahu (Teli) hnam niin, Ajit Jogi hnua Chattisgarh-in tribal CM a neih leh hmasa ber tur a ni. Prime minister Narendra Modi kaihhruai central sorkar hmasaah khan union minister of state for mines and steel a ni. Tun ṭum assembly inthlanah khan Kunkuri bialah dingin, Congress MLA ni lai UD Minj a hneh a ni.

Lok Sabha inthlanpuiah a zawnin ṭum li, 1999, 2004, 2009 leh 2014-ah Raigarh constituency aṭangin thlan tlin a ni. Hemi hma, kum 1990 leh 1993 khan Madhya Pradesh nena ṭhendarh an nih hmain Tapkara bialah assembly inthlanah thlan tlin a lo ni tawh bawk.