Social media-a 'hate video' post vangin mi 9 thubuai siamsak

Jammu and Kashmir police-te chuan social media-a thu dik tawk lo leh inhuatna chawk chhuak thei, 'hate video' post vangin mi pakhuat thubuai an siamsak tih an sawi. Thubuai siamsakte hi Kashmir Valley-a Gandarbal, Budgam, Baramulla, leh Anantnag district-a mite an ni.

Police-te chuan Budgam-ah thu dik tawk lo thehdarh vangin mi pahnih thubuai siamsak an ni a, Anantnag-ah mi pathum thubuai siamsak an ni tih an sawi. Baramulla-ah mi pakhat chu 'hate video' a upload vangin thubuai siamsak a ni a, Gandarbal-ah mi pahnih thubuai siamsak an ni bawk.

J&K DGP chuan 144 Code of Criminal Procedure hnuaiah thu dik tawk lo leh khawtlang inlungrualna tichhe thei message, video, thlalak leh audio post-tute chu zawn chhuah zel a ni dawn a, an thil post-te pawh hi forward phal a ni lo bawk tih a sawi. Social media lama inhuatna chawk chhuak thei zawnga thu thehdarh ṭhin laka fimkhur tur leh, hetiang thil ti lo tur hian mipuite an ngen a, lo tilui an awm chuan dan hmangin an chungah action lak a ni zel dawn tih a sawi.

BJP kaihhruai sorkar laipuiin Jammu and Kashmir tana special status pekna, Article 370 a tihtawp chungchanga petition thehluhte chu Supreme Court chuan vawiin hian thutlukna a siam tawh dawn a, hei vang hian J&K-ah hian hemi chungchang sawina hi social media lamah a tam hle. National Conference (NC) leh chief minister hlui, Omar Abdullah chuan Supreme Court hian Article 370 chungchangah hian an beisei loh danin thutlukna siam mah se, an party chuan J&K-a buaina siam zawnga an chet loh tur thu a sawi. Hemi rual hian boruak ṭha tak hnuaiah, mipuite dikna chanvo nei leh tura theihtawpa an beih tur thu a sawi bawk.

Kum 2019, August 5 khan sorkar laipui chuan Article 370 hi ṭhiatin, Jammu and Kashmir state chu union territory pahnih - Jammu and Kashmir leh Ladakh-ah a ṭhen a ni.