SC-in NEET, JEE Exam sawn dilna hnawl
Supreme Court chuan nimin khan September thlaa neih tur, National Eligibility cum Entrance Test (NEET) leh Joint Entrance Exam (JEE) examination sawn tura ngenna thehluh chu ngaihtuahin a hnawlsak.
Justice Arun Mishra kaihhruai bench chuan examination sawn dilna hi ngaihtuahin, ram chhunga hripui leng mek dinhmun pawh an hria a, mahse hei vang hian zirlaite chu kum hloh ngawt tir thei a ni lo tiin ngenna thehlut hi a hnawl a ni. Bench chuan theihtawpa fimkhur chungin nunphung chu zawh chhoh zel a ngai a ni, a ti.
Bench chuan Covid-19 chu a bo mai dawn rih lo tih sawiin, "Hei vang hian zirlaite hmalam hun chu tiam chin awm loa dan beh sak ngawt theih an ni lo," a ti. Hei vang hian ruahman lawk angin September thlaa exam tur chu kal tlangpui a ngai tih a sawi.
Hetih lai hian nimin vek khan doctor eng emaw zat chuan August 29-a All India AYUSH Post Graduate Entrance Test (AIAPGET)-2020 neih tur sawn tura ngenna chu Surpeme Court-ah hian an thehlut ve leh.