Insawifiah turin sorkar laipui hriattir

Uttarakhand High Court chuan sorkar laipui hnenah Uttarakhand-a Congress party sorkar fiah hun tur ruat fel vek a nih hnuah, a hun thlen hmaa hmanhmawh taka President's Rule a puanna chhan sawifiah turin sorkar laipui a hriattir.

Uttarakhand-a rorellai, Congress party MLA pakua-te chu Chief Minister Harish Rawat-a kaihhruai sorkar lakah an hel a, BJP chuan Congress MLA helte thlawpna nen sorkar thar a siam thei dawn niin a sawi. Mahse hetihlai hian Congress party chuan thlawptu a la ngah tawk niin a sawi thung. Hei vang hian Governor KK Paul chuan March 28-a Assembly inkhawmah sorkar fiahna hun buatsaih tur hian a hriattir a ni.

Mahse central-a BJP kaihhruai NDA sorkar chuan Uttarakhand sorkar fiah hun tura ruat, March 28 hma ni chiah, March 27 khan President Rule hnuaiah a dah a, hma lak theih lohin a siam zui ta a ni.

High Court chuan sorkar laipui hnenah floor test buatsaih chu politics buaina chinfelna tura thil ṭha ber a nih thu sawiin, sorkar laipuiin President's Rule a puan chuan eng ang thuchah nge lantir a tum tih sawichiang turin a ti bawk.

President's Rule puan a nih chungchangah hian Congress party chu High Court-ah hian an zualko a, Court chuan March 31-ah Assembly-a floor test nei turin thupek a tichhuak a, he hunah hian Speaker-in a lo hrem tawh, Congress MLA hel pakuate pawh vote an thlak phalsak an ni bawk ang.

Mahse Congress party chuan MLA hel pakua-te sorkar fiahnaa vote thlak phalsak an ni tur chu a dik lo nia sawiin, a ṭul anga hma lak an tum thu an sawi. Vote laknaah hian MLA zawng zawngte vote thlak phalsak an ni dawn a, mahse Congress MLA pakua-te vote erawh chu a hranga dah a ni ang.

Hetihlai hian sorkar laipui chuan High Court-in Uttarakhand sorkar fiahna tur hi a remti a nih chuan, sorkar pahnih a awm tihna a ni tiin a sawi. High hriattirna pek hi chhangin, sorkar lapui chuan Uttarakhand chu President's rule hnuaia awm a nih tawh avangin eng sorkar mah a ding tawh lo a, assembly building ruak mai a ni tawh a ni, a ti.

Attorney General Mukul Rohatgi chuan, 'High Court hian engvangin he thupek hi a siam kher? Assembly-a vote lak tura tih chu ṭhulh fel vek a ni tawh a, engtinge judge chuan house chu rorel tura a koh theih ang? House a awm tawh lo a, ṭhutkhawm theih a ni tawh lo" tiin, President' Rule hnuaia dah a nih aṭangin MLA pawh an awm tawh lo tih a sawi.

Central-a BJP thawhpui, Shiv Sena chuan BJP sorkarin Uttarakhand state-a President's Rule a puang chu na takin a sawisel. Sena hian an pawl chanchinbu, Saamna editorial-ah hemi chungchang hi ziak langin, CM Harish Rawat-a kaihhruai sorkar fiah a nih dawn hma ni chiaha President's Rule puan a nih chhan chu sawifiah turin sorkar laipui a phut. Shiv Sena chuan Congress sorkar thuthlung leh a kaihhruai sorkara eirukna thleng ṭhin chu an dodal tlat tih an sawi a, hemi rual hian, "Mipuiten an aiawh tura an thlanchhuah sorkar chu paihthlak a nih dawn pawhin democracy kalphung dik taka paih a ni tur a ni" a ti. Congress sorkarna state, Arunachal Pradesh leh Uttarakhand-a BJP sorkar chetdan thlirin, Himachal Pradesh-a Congress sorkar chu a buai leh a nih pawhin thil mak a ni dawn lo a ni, a ti.