Vijay Mallya'n Sept.-ah Rs vbch 4,000 pek a tum

Vijay Mallya chuan Supreme Court hnenah bank hrang hranga leiba a neih mek aṭangin cheng vaibelchhe 4,000 chu September thlaah pe tura ruahmanna a siamte a hriattir.

Mallya hian SC hnen-ah a leibatna bank 17-te chu ṭum hnih video confe-rence a neihpui tawh thu sawiin, September thlaah rulh a tum thu a hrilh a ni.

SC chuan Vijay Mallya rawtna siam chung-changah bank-te hi kar khat chhunga an chhan-na thehlut turin a hriattir nghal a, April 7-ah hemi chungchang hi ngaihtuah chhunzawm leh a ni ang. Hetihlai hian bank-te chuan Mallya rawtna siam hi zirchian phawt an tum thu an sawi.

Mallya leh a company hlui, Kingfisher Airlines-in bank 17 hnena loan a rulh tur hi a pungte nen cheng vaibelchhe 9,000 chuang a tling tawh a ni. Bank-te hian leiba tam tak a neih avangin Mallya hi India ram chhuahsan khapsak turin Supreme Court-ah an lo thlen tawh a, mahse an thu thlen hi ngaihtuah a nih hma March 2 khan Mallya hian India ram a chhuahsan hman a, London-ah a awm mek a ni. Enforcement Directorate chuan Mallya hi April 2-ah an hmaah inlan turin a hriattir a ni.

Vijya Mallya-a Airline hnena loan puk tirtute chu SBI-in cheng vaibelchhe 1,600, Punjab National Bank leh IDBI Bank (vaibelchhe 800 ve ve), Bank of India (vbch 650), Bank of Baroda (vbch 550), Central Bank of India (vbch 410), UCO Bank (vbch 320) , Corporation Bank (vbch 310), State Bank of Mysore (vbch 150), Indian Overseas Bank (vbch 140 ), Federal Bank ( vbch 90 ), Punjab & Sind Bank (vbcb 60) leh Axis Bank (vbch 50 crore) te an ni.