Delhi sorkarin mipuite himna ngai pawimawh

Delhi Chief Minister Arvind Kejriwal-a chuan nimin khan Lieutenant Governor Najeeb Jung khawpui chhunga mipuite himna tura hmalakna hrang hrang changtlung zawka kalpui a nih theih dan turte a sawipui.

CM leh Lt Governor meeting-ah hian khawpui chhung a him zawkna atana CCTV camera dah te, police leh civil defence volunteer te inkara thawhhona
ṭha a awm theih dan te, hmun biru leh thim lai tihen a nih theih dan tur te, hmeichhiate himna tura hmalakna nana ṭul hrang hrangte leh, sorkar, MLA leh police-ten thawhhona mumal tak an neih theih dan turte an sawidun.

Delhi-a AAP sorkar hian kawng hrang hrangin Delhi khawpuia chengte himna tur hian hma a lo la tawh a, budget a pharh tharah pawh hmeichhiate himna leh thuam chakna tura hmalak nan cheng vaibelchhe 1,068 a dah a ni.

Delhi Finance Minister Manish Sisodia chuan sorkarin DTC bus-ah CCTV camera 200 a dah tawh thu a sawi a, public transport vehicle zawng zawngah an kalna chin chhui zui a nih theih n an GPS system hmang vek tura hriattir an ni bawk a ni, a ti. Hei hian khawpui chhunga taxi tlante pawh a huam tel a ni.

Sorkar chuan residential area-ah CCTV camera leh surveillance system dahna tur scheme thar a duang bawk a, hemi atan hian budget tharah cheng vaibelchhe 200 dah a ni. Sisodia chuan police leh NGO hrang hrang nena chanchin an inhrilh tawn aṭangin, khawpui chhungah hmun biru leh thim zual, tihen ngai hmun 42,000 thlan a ni tawh tih a sawi.