Jammu & Kashmir-ah CRPF pahnih leh police officer thah an ni

Jammu and Kashmir hmar lam Baramulla district hmuna Kreeri-ah security force leh firfiakte nimin zing khan an inbei a, he inbeihnaah hian CRPF pahnih leh police officer pahnih an thi.

Baramulla district-a Kreeri-ah hian CRPF leh police-te ṭangkawp chuan nimin zing dar 9:30 vel khan patrolling an nei a, patrolling an neih lai tak hian firfiakte chuan silaiin an rawn kap zui ta niin police lam official-te chuan an tarlang.

Pawikhawihtu fir­fiakte hian security force-te an kah hnuah an tlanchhe zui nghal a, hei vang hian tute nge an nih tih hriat hman a ni lo. August 14 khan firfiakte chuan Srinagar-a Nowgam hmuna SSB leh police patrolling neih chu an lo kap buai tawh a, kha inkahnaah khan police pahnih an thi a ni. 

Kha thil thlenga pawi­khawihtute chu Pakis­tan thlawp Jaish-e-Moham­mad firfiakte an nih thu police-te chuan an sawi. Hei vang hian tun ṭuma pawikhawihtute hi Jaish-e-Mohammad firfiakte bawk an nih rin a ni. 

Nimin zinga security force-te thahna thleng hi ni 4 chhunga firfiakte beihna security force ten an tawh ṭum hnihna a ni. Pawikhawihna a thlen rual hian security force-te chuan theihtawpin firfiakte zawn hna leh  beih let hna an thawk nghal a, tute tih nge hriat tumin ngawrh takin an chhui zui mek bawk.