Special category state-a Bihar dah turin Nitish Kumar-a'n ngen

Bihar chief minister Nitish Kumar chuan Patna-a Eastern Zonal Council meeting neih mekah, union home minister Amit Shah hnenah Bihar chu special category state-a dah turin a ngen thu a sawi. Nitish hian state-in dan thar a neih chu India constitution 9th schedule-a dah turin a ngen thu a sawi bawk.

Nitish Kumar chuan,"Kum nga chhunga zawh vek turin Rs vbc 2.5 man hna ruahman a ni a, heng hi Bihar-in special category state nihna a neih chuan a ai hmaa zawh vek theih a ni. Bihar tana special state nih hi 2010 aṭang khan kan ngen tawh a, India sulhnu chhui kirin Bihar hi state hlu tak a ni. Hmasawnna hna thawh awm reng mah se, rampum huapa hmasawnna a thlen laiin Bihar hi a hnufual bik hle. Special state ni tura tih ngai leh nih ngaite chu Bihar hian kan ti vek a, caste survey neih a nih leh tak bawk avangin special category state nihna pek hi uluk taka min ngaihtuahsak tawh ka beisei," tiin Amit Shah hi a ngen.

CM chuan,"State sorkar hian sorkar laipui chu India constitution 9th schedule-a reservation dan thar kan siam hi a seng luh kan duh a ni. Hei hi a thlen dik ngei ka beisei a, Union Minister hian rampuma caste based suvey neih bakah, Bihar special state a a puan hi ka beisei bawk a ni," a ti.

Ministry of Home Affairs-in Eastern Zonal Council meeting chungchang thuchhuaha an tarlanah, Amit Shah chuan an party-in Bihar-a ro an rel lai pawh khan caste survey neih hi chu thlawp thu a sawi tih an tarlang. Patna-a Eastern Zonal Council meeting neihah hian Jharkhand chief minister, Odisha chief minister leh West Bengal chief minister te an tel lo niin an tarlang.