September-a J&K assembly inthlan nei turin SC-in hriattir

Supreme Court chuan Election Commission chu September 30, 2024 ral hmaa Jammu & Kashmir assembly inthlan buatsaih turin a hriattir. Supreme Court hian sorkar laipui chu J&K state-a siam leh vat turin a hriattir bawk.

Nimin khan chief justice of India, DY Chandrachud kaihhruai judge panga ṭhutna Supreme Court bench chuan Jammu & Kashmir tana special status pekna, article 370 sorkar laipuiin a hlihsak chungchanga petition lutte an ngaihtuah a ni. Court hian article 370 hlihna hi dan hnuaiah a pawm thu sawi mah se, J&K chu state nihna pe leh turin sorkar laipui hi a hriattir a ni.

August 5, 2019-a article 370 ṭhiah a nih khan Jammu & Kashmir hi J&K leh Ladakh Union Territory-ah te ṭhen a ni a, assembly inthlan an neih hnuhnun ber chu 2014 kha niin, sorkar thlan hnuhnung ber hi 2018 khan ṭhiah a ni bawk. Hemi hnu hian, article 370 ṭhiah a nih hma thlengin President's rule hnuaiah an awm a ni.