India-ah hri kai hmuh chhuah thar 6,566 an awm
Covid-19 leng chuan ziaawm lam a pan thei lo a, nimin khan hri kai hmuh chhuah thar 6,566 an awm leh.
Ni eng emaw zat chhung chu hri kai hmuh chhuah thar hi 6,000 an chuang ta a, a tam ber ni chuan 6,977 a tling hial. Hri kai hmuhchhuah hi 1,58,333 an awm tawh a, enkawl dam 67,692 awm tawhin mi 4,531-in an thihpui tawh bawk. Hri vei mek 86,110 an awm a ni.
Health and Family Welfare Ministry chuan nimina report an tihchhuah hma darkar 24 chhung khan mi 3,266 enkawl dan an awm tih an sawi a, thi 194 an awm belh bawk.
Enkawl dam rate hi 42.75% a tling tawh.
State malah chuan Maharashtra an la sang fal zel a, mi 56,948-in an vei tawh a, hmuh chhuah thar 2,190 an awm leh bawk. Enkawl dam 17,918 an awm laiin thihpui 1,897 an awm tawh a ni.
Tamil Nadu bawkin Maharashtra an la dawt a, Tamil-ah hian mi 18,545 in Covid-19 an kai tawh a, kai thar 817 lai an awm. Thihpui 133 an awm thung a, enkawl dam tawh mi 9,909 an awm bawk
Delhi chu state/UT zingah hri kai tam pathumna niin thihpui 303 an awm tawh a, hri kai hmuh chhuah tawh mi 15,257 an tling tawh a, kai thar 792 an awm.
Hri kai tam lamah hian Delhi hnuaiah Gujarat chu awm mah se thihpui tam lamah erawh Maharashtra dawttu an ni thung. Gujarat-ah hian mi 938 laiin an thihpui tawh a, Nilaini khan he hri vang hian mi 23-in an thi a ni.
Rajasthan-ah pawh hri kai an pun belh zel a, mi 167-in an kai belh leh a, enkawl dam tawh 4,457 an awm tawh a, hri kai hmuh chhuah tawh hi 7,703 an tling tawh a ni.
June aṭangin hri kai zat an pung zual dawn : NIMHANS
National Institute of Mental Health & Neuro Sciences (NIMHANS)-a Neurovirology head Dr V Ravi chuan Covid-19 vanga ram puma lockdown hman mek chu May 31-ah a zawh tawh dawn avangin June thla aṭangin India ramah hri leng hi a la hluar chho zel dawn a, hri kai pawh an pung zual dawn ngei nia a ngaih thu a sawi.
Dr Ravi chuan, "Hri kai pun chhoh chak dan ngaihtuahin, December thla laihawl velah chuan India mipui zinga 50% dawn hian Covid-19 hi an kai tawh maithei a ni. Hemi ruala thu lawmawm awm erawh chu hri kai zinga 90% vel chu an taksaa natna langchhuak nei lo, asymptomatic niin hri an kai tih pawh an inhre kher lo ang," a ti.
Lockdown 4.0 hman mek chu a tawp hnai tawh avangin state hrang hrangten hri kai pung chho zel tur atan an medical infrastructure te an thuamṭhat a ngai dawn tih a sawi. Indian Council of Medical Research (ICMR) pawhin prime minister Narendra Modi thurawn angin, state tinte chu Covid-19 testing laboratory pahnih tal nei turin a lo ti tawh bawk.