Khaukhuap puang laka invenna tur siam turin hriattir

Union ministry of agriculture and farmers welfare chuan khaukhuap puangin a tihbuai state sorkarte hnenah he thil hi ngaihven rang tur leh, a invenna  tur kawnga ruahmanna siam turin a hriattir. 

Pakistan aṭanga India-a rawn phei, khaukhuap hian Rajasthan, Gujarat, Madhya Pradesh leh Haryana te a thleng tawh a; Maharashtra, Uttar Pradesh leh Punjab lam a tibuai leh ṭan mek a ni. 

Ministry chuan khaukhuap puangin a tihbuai state hrang hrangah hian khau tihremna atan pesticide spray phur fire brigade 89, survey vehicle 120, control vehicle 47 leh tractor-mounted sprayer 810-te chu an hman tura pek a ni tawh tih a sawi.  

Odisha sorkar chuan an state-a he khaukhuap puang hi a lo thlen pawha harsatna an tawh loh nan, Nilaini khan loneitute tan guideline a tichhuak a ni. India rama loneituten he khaukhuap vanga harsatna an tawh loh nan, an buh leh thlaite chu pesticide hmanga phuh tura hriattir an nih bakah, he pesticide nei lote chu neem hnah leh tui nena chawlh pawlha an thlaite chu phuh tura hriattir an ni.

Kumina India khaukhuap puang hi  desert locust tih a ni a, he khaukhuap hi darkar khatah kilometer 100 a thlawk thei niin mithiamte chuan an sawi.