J&K kaihhnawih bill pahnih Rajya Sabha-in pass ve leh

Lok Sabha-in kar hmasa lama a pass tak; Jammu & Kashmir Reorganisation (Amendment) Bill, 2023 leh Jammu & Kashmir Reservation (Amendment) Bill, 2023 te chu Rajya Sabha chuan Thawhṭanni khan a pass ve leh.

Jammu & Kashmir Reorganisation (Amendment) Bill, 2023 hian Kashmir assembly-a seat awm zat, seat 107 chu seat 114-ah a tipung a ni. Seat 114 aṭanga seat kua chu reserved seat ni tawhin; raltlan, Pakistan awp Kashmir aṭanga tlan chhia leh Scheduled tribe te tana reserved seat a ni tawh dawn a ni. He bill hmang hian J&K Lt. Governor chuan assembly-ah member pathum; Kashmir-a raltlan zing aṭangin mi pahnih, pakhat hmeichhia leh Pakistan awp Kashmir aṭanga indona avanga tlan chhe zing aṭangin pakhat a nominate thei tawh bawk ang.

Jammu & Kashmir Reservation (Amendment) Bill, 2023 hmang hian J&K Reservation Act, 2004-a 'weak and underprivileged classes' tih chu 'other backward classes' tiha thlak a ni tawh dawn bawk. He dan hmang hian scheduled castes, scheduled tribe leh khawtlanga chan chhe zawkte chuan thiamna bik zir theihna zirna in angah te an tan hnathawh leh zirna tur reservation siam ṭhin a ni.

Union home minister Amit Shah chuan Jammu & Kashmir tana sorkarin bill pahnih a buatsaih chu kum 75 liam ta chhunga an dikna chanvo rahbehsakte tana rorelna dik petu tur a nih thu sawiin, an in leh lo tlansana hmun danga awmte pawhin rorelna hmunah an ngaihdan an sawi ve thei tawh ang, a ti. Shah hian prime minister hlui Jawaharlal Nehru thil tihsual avangin Jammu & Kashmir chuan a tuar a ni tiin, hun lo taka inkahhai a puan leh, J&K buaina United Nations hnena a thlen chu a tihsual lian tak a nih thu a sawi.